എഡ്ജ്ബാസ്റ്റണ്‍: കോമണ്‍വെല്‍ത്ത് ഗെയിംസിലെ വനിതാ ട്വന്റി20യില്‍ ഇന്ത്യക്ക് ഇന്ന് സെമി ഫൈനല്‍ പോര്. ഇംഗ്ലണ്ട് ആണ് ഇന്ത്യയുടെ എതിരാളികള്‍. ഇന്ത്യന്‍ സമയം 3.30നാണ് മത്സരം.
ഗ്രൂപ്പ് എയില്‍ നിന്ന് രണ്ടാം സ്ഥാനക്കാരായണ് ഇന്ത്യ സെമിയിലെത്തിയത്. മൂന്ന് മത്സരങ്ങളില്‍ രണ്ടെണ്ണം ജയിച്ചപ്പോള്‍ ഓസ്‌ട്രേലിയക്ക് മുന്‍പില്‍ തോല്‍വി വഴങ്ങി. ഗ്രൂപ്പ് ബിയില്‍ ഒന്നാമതായാണ് ഇംഗ്ലണ്ടിന്റെ വരവ്. മൂന്ന് മത്സരങ്ങിലും ഇംഗ്ലണ്ട് ജയം നേടി.
ട്വന്റി20 ക്രിക്കറ്റില്‍ 22 വട്ടമാണ് ഇന്ത്യയും ഇംഗ്ലണ്ടും ഏറ്റുമുട്ടിയത്. അതില്‍ 17 വട്ടവും ജയം പിടിച്ചത് ഇംഗ്ലണ്ട്. ഇന്ത്യ ജയിച്ചത് 5 തവണ മാത്രം. കഴിഞ്ഞ 5 വട്ടം നേര്‍ക്കുനേര്‍ വന്നപ്പോള്‍ ഇംഗ്ലണ്ട് 3 ജയവും ഇന്ത്യ രണ്ട് ജയവും നേടി. 2017ലെ വനിതാ ലോകകപ്പ് ഫൈനലില്‍ ഇംഗ്ലണ്ടിന്റെ കൈകളില്‍ നിന്ന് നേരിട്ട തോല്‍വിക്കും ഇന്ത്യക്ക് കണക്ക് വീട്ടാനുണ്ട്.
