പാരീസ്: ഫ്രഞ്ച് ഓപ്പണ്‍ പുരുഷ സിംഗിൾസിൽ നോർവീജിയൻ താരം കാസ്പെർ റൂഡ് ഫൈനലിൽ. സെമി പോരാട്ടത്തിൽ ക്രൊയേഷ്യയുടെ മാരിൻ സിലിച്ചിനെ തോൽപ്പിച്ചാണ് റൂഡ് ഫൈനലിൽ കടന്നത്. ഞായറാഴ്ച നടക്കുന്ന ഫൈനലിൽ റാഫേൽ നദാലാണ് 23കാരനായ റൂഡിന്‍റെ എതിരാളി.
എട്ടാം സീഡ് ആയ കാസ്പർ റൂഡ് ആദ്യ സെറ്റ് കൈവിട്ട ശേഷമാണ് മത്സരം തിരിച്ച് പിടിച്ചത്. ആദ്യ സെറ്റ് 6-3 നു സിലിച്ച് നേടി. 6-4 നു രണ്ടാം സെറ്റ് നേടി റൂഡ് മത്സരത്തിൽ തിരിച്ചു വന്നു. മൂന്നാം സെറ്റ് 6-2 നു നേടിയ റൂഡ് നാലാം സെറ്റും സമാനമായ സ്കോറിന് നേടി ഫൈനൽ ഉറപ്പിച്ചു.
റാഫേൽ നദാൽ അക്കാഡമിയിലൂടെ വളർന്ന താരമാണ് റൂഡ്. നാല് വർഷം മുമ്പ് നദാൽ അക്കാദമിയിൽ ചേർന്ന റൂഡ് കടുത്ത നദാൽ ആരാധകൻ കൂടിയാണ്. ഫൈനലിൽ നദാലിനെ റൂഡ് നേരിടുന്നത് മത്സരം കൂടുതൽ ആവേശകരമാക്കും.
