ജയ്പൂർ: കോൺഗ്രസ് നേതാവ് സച്ചിൻ പൈലറ്റ് ബിജെപിയിലേക്കെന്ന ബിജെപി നേതാവ് റീത്ത ബഹുഗുണ ജോഷിയുടെ അവകാശവാദത്തിന് അടിസ്ഥാനമില്ലെന്ന് സച്ചിൻ പൈലറ്റ്. കഴിഞ്ഞ ജൂലൈയിൽ മുഖ്യമന്ത്രി അശോക് ഗെഹ്ലോട്ടുമായി പരസ്യ പ്രതിഷേധവുമായി സച്ചിൻ രംഗത്തെത്തിയിരുന്നു. ഈ സമയത്ത് സച്ചിൻ ബിജെപിയുമായി അടുക്കുന്നുവെന്ന് വാർത്തകൾ പുറത്തു വന്നിരുന്നു. ഇതിന് പിന്നാലെയാണ് റീത്ത ബഹുഗുണയുടെ പരാമർശം.
താൻ സച്ചിനുമായി സംസാരിച്ചെന്നും കോൺഗ്രസ് നേതൃത്വത്തിൽ അതൃപ്തനായ അദ്ദേഹം ഉടൻ ബിജെപിയിൽ ചേരും എന്നുമായിരുന്നു റീത്ത പറഞ്ഞത്. എന്നാൽ റീത്ത ബഹുഗൂണ അവകാശപ്പെടുന്നത് സച്ചിനുമായി സംസാരിച്ചു എന്നാണ്. ഒരുപക്ഷെ അവർ സംസാരിച്ചത് സച്ചിൻ ടെൻഡുൽക്കറുമായിട്ടാകും. എന്നോട് സംസാരിക്കാനുള്ള ധൈര്യം അവർക്കില്ലെന്നുമായിരുന്നു സച്ചിന്റെ വാക്കുകൾ.
യുപിയിലെ പ്രമുഖ കോൺഗ്രസ് നേതാവ് ജിതിൻ പ്രസാദ കഴിഞ്ഞ ദിവസം ബിജെപിയിൽ ചേർന്നിരുന്നു. ഇതിന് പിന്നാലെ നിരവധി പേരുകൾ അഭ്യൂഹങ്ങളായി പുറത്തുവരികയും ചെയ്തിരുന്നു. അതേസമയം ജിതിൻ പ്രസാദയുടെ കൂടുമാറ്റത്തോടെ കോൺഗ്രസ് നേതൃത്വത്തിനെതിരെയുള്ള വിമർശനം ശക്തമാവുകയാണ്.
