കോട്ടയം: പാലായ്ക്ക് സമീപം കിടങ്ങൂരിൽ വ്യാപാര സ്ഥാപനത്തിന് തീപിടിച്ചു. പുലർച്ചെ 1.15ഓടെയാണ് സംഭവം. കിടങ്ങൂർ ഹൈപ്പർ മാർക്കറ്റ് എന്ന സ്ഥാപനത്തിലാണ് തീപിടിത്തമുണ്ടായത്.
സ്ഥലത്തുണ്ടായിരുന്ന പോലീസുദ്യോഗസ്ഥരാണ് സംഭവം ആദ്യം കണ്ടത്. ഇവർ ഉടൻതന്നെ വിവരം കെഎസ്ഇബി അധികൃതരെ അറിയിച്ച് വൈദ്യുതി ബന്ധം വേർപെടുത്തി. തീപിടിച്ച കെട്ടിടത്തിന് മുകളിൽ താമസിച്ചിരുന്നവരെ പോലീസ് രക്ഷപെടുത്തി.
തുടർന്ന് ഫയർഫോഴ്സ് എത്തിയാണ് തീയണച്ചത്. സംഭവത്തിൽ 90 ലക്ഷത്തോളം രൂപയുടെ നഷ്ടമുണ്ടായതായി കണക്കാക്കുന്നു.
