തിരുവനന്തപുരം: പാര്‍ട്ടി പറഞ്ഞാല്‍ തിരഞ്ഞെടുപ്പില്‍ മത്സരിക്കുമെന്ന് കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍. പ്രതിപക്ഷ നേതാവെന്ന നിലയില്‍ രമേശ് ചെന്നിത്തല മികച്ച പ്രവര്‍ത്തനം കാഴ്ചവച്ചെന്നും അദേഹം പറഞ്ഞു. ഉമ്മന്‍ ചാണ്ടി നേതൃസ്ഥാനത്ത് തന്നെ ഉണ്ടായിരുന്നുവെന്നും താനിതുവരെ അധികാര സ്ഥാനങ്ങള്‍ അന്വേഷിച്ചു പോയിട്ടില്ലെന്നും അദേഹം വ്യക്തമാക്കി.
തിരഞ്ഞെടുപ്പില്‍ കോണ്‍ഗ്രസിനെ കൂട്ടായ നേതൃത്വം നയിക്കുമെന്നും മുല്ലപ്പള്ളി മാധ്യമങ്ങളേട് പ്രതികരിച്ചു. എന്നാല്‍ കെ മുരളീധരന്റെ വിമര്‍ശനത്തോട് പ്രതികരിക്കുന്നില്ലെന്ന് അദേഹം വ്യക്തമാക്കി. നിയമസഭാ തിരഞ്ഞടുപ്പില്‍ കല്‍പ്പറ്റയില്‍ നിന്ന് മുല്ലപ്പള്ളി മത്സരിക്കുമെന്നാണ് സൂചന. ഇക്കാര്യം ഹൈക്കമാന്‍ഡുമായി ചര്‍ച്ച നടത്തിയിട്ടുണ്ട്.
ജയസാധ്യതുള്ള മുതിര്‍ന്ന നേതാക്കള്‍ മത്സരിക്കുമെന്ന അഭിപ്രായമാണ് ഹൈക്കമാന്‍ഡിനുള്ളത്. സ്ഥാനാര്‍ത്ഥി നിര്‍ണയം സംബന്ധിച്ച്‌ ഹൈക്കമാന്‍ഡുമായുള്ള ചര്‍ച്ച ഇന്നലെ പൂര്‍ത്തിയായിരുന്നു.
