മട്ടന്നൂര്‍ (കണ്ണൂര്‍): കൊല്ലപ്പെട്ട യൂത്ത് കോണ്‍ഗ്രസ് നേതാവ് ഷുഹൈബിന്റെ നാട്ടില്‍ മുസ്ലിം ലീഗിന് വിജയം. ഷുഹൈബിന്റെ നാടായ കീഴല്ലൂര്‍ പഞ്ചായത്തിലെ രണ്ടാം വാര്‍ഡ് എടയന്നൂരിലും കൊല്ലപ്പെട്ട സ്ഥലമായ തെരൂരിലും യുഡിഎഫ്-വെല്‍ഫെയര്‍ പാര്‍ട്ടി സ്ഥാനാര്‍ഥികളാണ് വിജയിച്ചത്.
എടയന്നൂരില്‍ ലീഗ് സ്ഥാനാര്‍ഥി ഷബീര്‍ എടയന്നൂര്‍ 240 വോട്ടിനാണ് വിജയിച്ചപ്പോള്‍ തെരൂരില്‍ യുഡിഎഫ് പിന്തുണച്ച വെല്‍ഫെയര്‍ പാര്‍ട്ടി സ്ഥാനാര്‍ഥി കൗലത്ത് ടീച്ചറാണ് വിജയിച്ചത്.
എടയന്നൂരില്‍ ലീഗ്-കോണ്‍ഗ്രസ് പാര്‍ട്ടികള്‍ തമ്മില്‍ തര്‍ക്കം നിലനിന്നിരുന്നതിനാല്‍ ഇരുവരും വേറിട്ടാണ് മത്സരിച്ചത്.
തെരഞ്ഞെടുപ്പ് ഒരുക്കത്തിന് മുമ്ബുതന്നെ എടയന്നൂര്‍ സീറ്റ് സംബന്ധിച്ച്‌ ജില്ല നേതാക്കള്‍ ചര്‍ച്ച ആരംഭിച്ചിരുന്നു. എന്നാല്‍, ഇരുവിഭാഗവും വിട്ടുവീഴ്ചക്ക് തയാറായില്ല.
കോണ്‍ഗ്രസ് സ്ഥാനാര്‍ഥിയായി മുന്‍ മെംബര്‍ സി. ജസീലയും മുസ്ലിം ലീഗ് സ്ഥാനാര്‍ഥിയായി യൂത്ത് ലീഗ് നേതാവ് ഷബീര്‍ എടയന്നൂരുമായിരുന്നു മത്സരിച്ചത്. വാര്‍ഡിലെ അനൈക്യം മുതലെടുക്കാന്‍ സിപിഎം സ്വതന്ത്ര സ്ഥാനാര്‍ഥിയെയായിരുന്നു നിര്‍ത്തിയത്.
കഴിഞ്ഞ തെരഞ്ഞെടുപ്പില്‍ തര്‍ക്കത്തെ തുടര്‍ന്ന് എല്ലാ വാര്‍ഡുകളിലും കോണ്‍ഗ്രസും മുസ്ലിം ലീഗും വെവ്വേറെയാണ് മത്സരിച്ചിരുന്നത്. ഇത്തവണ എടയന്നൂര്‍ ഒഴികെ മറ്റെല്ലാം വാര്‍ഡിലും യുഡിഎഫ് ഒറ്റക്കെട്ടായാണ് മത്സരിച്ചത്.
