ആലപ്പുഴ: നഗരത്തിൽ ഓടിക്കൊണ്ടിരുന്ന കാറിന് തീപിടിച്ചു. ഇന്ന് രാവിലെ 10.45ന് ആലപ്പുഴയിലെ ശവക്കോട്ടപ്പാലത്തിന് സമീപമായിരുന്നു സംഭവം. കലവൂർ പനവേലിമഠം കൃഷ്ണശർമയുടെ ഉടമസ്ഥതയിലുള്ള കാറാണ് കത്തിയത്.
ആലപ്പുഴ ഭാഗത്തേക്ക് വരുകയായിരുന്ന ഇൻഡിഗൊ കാറിൽനിന്ന് പുക ഉയർന്നതോടെ വാഹനം നിർത്തി യാത്രക്കാർ പുറത്തിറങ്ങി. യാത്രക്കാർ പെട്ടെന്ന് ഇറങ്ങിയതുമൂലം വൻ അപകടമാണ് തലനാരിഴയ്ക്ക് ഒഴിവായത്. തൊട്ടുപിന്നാലെ ബോണറ്റിൽ തീപിടിക്കുകയായിരുന്നു.
ബാറ്ററിഭാഗം കത്തിയതോടെ സമീപവാസികളും അഗ്നിരക്ഷാസേനയുമെത്തി തീകെടുത്തി. ബാറ്ററിയിൽനിന്നുള്ള ഷോർട്ട് സർക്യൂട്ടാണ് അപകടത്തിന് കാരണമെന്നാണ് പ്രാഥമികനിഗമനം. കാറിൽ ഡ്രൈവറടക്കം അഞ്ച് യാത്രക്കാരുണ്ടായിരുന്നു.
