കരിപ്പൂര്‍: കരിപ്പൂര്‍ അന്താരാഷ്ട്ര വിമാനത്താവളത്തില്‍ വീണ്ടും വൻ സ്വർണവേട്ട. വിമാനത്താവളത്തിൽ നിന്നും 76 ലക്ഷം രൂപയുടെ സ്വര്‍ണം പിടികൂടി. ദുബായില്‍ നിന്നെത്തിയ മൂന്ന് യാത്രക്കാരില്‍ നിന്നാണ് കോഴിക്കോട് പ്രിവന്റീവ് കസ്റ്റംസും എയര്‍ കസ്റ്റംസും ഇന്റലിജന്‍സ് വിഭാഗവും നടത്തിയ സംയുക്ത പരിശോധനയിൽ 1443.3 ഗ്രാം സ്വര്‍ണവും 136 ഗ്രാം സ്വര്‍ണ മിശ്രിതവും പിടികൂടിയത്.
സ്വര്‍ണക്കടത്തുമായി ബന്ധപ്പെട്ട് ദുബായില്‍ നിന്ന് ഇന്റിഗോ വിമാനത്തിലെത്തിയ മലപ്പുറം കാളികാവ് സ്വദേശിയെ പോലിസ് കസ്റ്റഡിയിലെടുത്തു. അസി. കമ്മീഷണര്‍ കെ വി രാജന്റെ നിര്‍ദേശപ്രകാരം സൂപ്രണ്ട് സി സുരേഷ് ബാബു, ഇന്‍സ്‌പെക്ടര്‍മരായ ഇ മുഹമ്മദ് ഫൈസല്‍, എം പ്രതീഷ്, സന്തോഷ് ജോണ്‍ തുടങ്ങിയവര്‍ പരിശോധനയില്‍ പങ്കെടുത്തു.
