കണ്ണൂർ: പയ്യന്നൂരിൽ പുതിയ ബസ് സ്റ്റാന്‍റ് കെട്ടിടത്തിന്‍റെ സമീപമുള്ള ഷോപ്രിക്‌സ് ഷോപ്പിംഗ് മാളിൽ വൻ തീപിടുത്തം. ഇന്ന് രാവിലെയാണ് ഷോപ്പിംഗ് മാളിൽ തീപിടുത്തമുണ്ടായത്. മാളിന്‍റെ മുകൾ ഭാഗത്താണ് തീപടർന്നത്. ഷോർട്ട് സർക്യൂട്ടാണ് തീപിടുത്തത്തിനു കാരണമെന്നാണ് പ്രാഥമിക നിഗമനം.
തൊട്ടടുത്ത കെട്ടിടത്തിലേക്കും തീ പടർന്നു. മാളിൽ നിന്ന് മുഴുവൻ ആളുകളെയും പോലീസെത്തി ഒഴിപ്പിച്ചതിനാൽ വൻ ദുരന്തം ഒഴിവായി. മൂന്ന് നില കെട്ടിടത്തിന്‍റെ ടെറസ് ഷീറ്റ് ഉപയോഗിച്ച് മറച്ച് പാചകശാലയാക്കിയിരുന്നു. കെട്ടുകണക്കിന് വിറകാണ് ഇവിടെ സൂക്ഷിച്ചിരുന്നത്. ഒരു സിലിണ്ടറും ഇവിടെ പൊട്ടിത്തെറിച്ചതായി സൂചനയുണ്ട്.
പത്ത് അഗ്നിശമനസേനാ യൂണിറ്റുകളുടെ മണിക്കൂറുകൾ നീണ്ട പരിശ്രമത്തിനു ശേഷമാണ് തീയണയ്ക്കാൻ കഴിഞ്ഞത്. പോലീസ് അന്വേഷണം ആരംഭിച്ചിട്ടുണ്ട്.
