കൊച്ചി: കാറിൽ അഭ്യാസം കാണിച്ചിറങ്ങിയ യുവാവിനെ കല്ലെറിഞ്ഞ് ഓടിച്ച് ജനങ്ങൾ. കലൂർ ജവഹർലാൽ നെഹ്രു സ്റ്റേഡിയത്തിലാണ് സംഭവം. ജനകൂട്ടം നോക്കി നിൽക്കെ കാർ ഡ്രിഫ്റ്റ് ചെയ്യാൻ ശ്രമിച്ചത് ചോദ്യം ചെയ്തതിനെ തുടർന്നുണ്ടായ തർക്കമാണ് കയ്യാങ്കളിയിലും കല്ലേറിലും കലാശിച്ചത്. സംഭവത്തിൻ്റെ വീഡിയോ ഇപ്പോൾ സോഷ്യൽ മീഡിയയിൽ വൈറലാണ്.
പെരുമ്പാവൂർ രജിസ്ട്രേഷൻ കാറിലെത്തിയ യുവാവ് നാട്ടുകാർക്ക് നേരെ കയർക്കുന്നതും വീഡിയോയിൽ വ്യക്തമായി കാണാം. പെരുമ്പാവൂർ മേതല സ്വദേശി രാജീവിൻ്റെ ഉടമസ്ഥതയിലുള്ള കാറാണ് അഭ്യാസത്തിന് ഉപയോഗിച്ചത്.
കലൂർ സ്റ്റേഡിയത്തിൽ ഇത് നിത്യ സംഭവമാണ്. കഴിഞ്ഞ ദിവസം നടൻ ഡ്രാക്കുള സുധീറിൻ്റെ ഭാര്യ പ്രിയയെ കാർ ഇടിച്ച് വീഴ്ത്തിയിരുന്നു. ഇതേ തുടർന്ന് പോലീസ് പട്രോളിംഗ് ശക്തമാക്കിയിരുന്നു. നടൻ ഡ്രാക്കുള സുധീർ, ഭാര്യ പ്രിയ സുധീർ, സംവിധായകൻ പോളി വടക്കൻ എന്നിവർക്കിടയിലേക്കാണ് നേരത്തേ നിയന്ത്രണം വിട്ട കാർ പാഞ്ഞ് കയറിയത്.
