കൊച്ചി: തന്റെകയ്യിൽ നിന്ന് പണം തട്ടാന്‍ ശ്രമിച്ചവര്‍ വിവാഹാലോചനയുമായാണു വീട്ടിലെത്തിയതെന്നു നടി ഷംന കാസിം. തൃശൂരില്‍നിന്നു വന്ന വിവാഹാലോചനയില്‍ താത്പര്യം പ്രകടിപ്പിച്ചപ്പോള്‍ ഇവര്‍ പിതാവുമായും സഹോദരനുമായും ബന്ധപ്പെട്ടിരുന്നു. ഒന്നു രണ്ടു തവണ വരനായി എത്തിയ ആളോടു ഫോണില്‍ സംസാരിക്കുകയും ചെയ്തിരുന്നു. ഒരാഴ്ച മുൻപാണ് ഇവർ വിവാഹാലോചനയുമായി എത്തിയതെന്നും കുടുംബവുമായി അടുത്തുകൂടി പണം തട്ടാന്‍ ശ്രമിക്കുകയായിരുന്നെന്നും ഷംന കാസിം പറഞ്ഞു.
കഴിഞ്ഞ ദിവസം വരനായി എത്തിയ ആള്‍ ഫോണില്‍ വിളിച്ചു ഒരു ലക്ഷം രൂപ വേണമെന്ന് ആവശ്യപ്പെട്ടുവെന്നും ഷംന പറഞ്ഞു. ഇതിനിടെ സിസിടിവി ദൃശ്യങ്ങള്‍ പരിശോധിച്ചപ്പോള്‍ വിവാഹാലോചനയുമായി എത്തിയവര്‍ തന്‍റെ വീടിന്‍റെയും പരിസരത്തിന്‍റെയും ചിത്രം മൊബൈല്‍ ഫോണില്‍ പകര്‍ത്തിയതു കണ്ടെത്തി. മറ്റാരും ഇവരുടെ തട്ടിപ്പില്‍ ഇരകളാകാതിരിക്കാനാണു പോലീസില്‍ പരാതി നല്‍കിയതെന്നും നടി പറഞ്ഞു.
നടിയെ ബ്ലാക്ക്മെയില്‍ ചെയ്തു പണം തട്ടാന്‍ ശ്രമിച്ച കേസില്‍ തൃശൂര്‍ സ്വദേശികളായ അഷ്റഫ്, രമേശ്, റഫീഖ്, ശരത് എന്നിവരെയാണു മരട് പോലീസ് അറസ്റ്റ് ചെയ്തിരിക്കുന്നത്. ഇവരെ കോടതിയില്‍ ഹാജരാക്കി റിമാന്‍ഡ് ചെയ്തു.
