ന്യൂഡെൽഹി: സൈബർ ആക്രമണത്തെക്കുറിച്ച് മുന്നറിയിപ്പ് നൽകി സ്റ്റേറ്റ് ബാങ്ക് ഓഫ് ഇന്ത്യയും. തങ്ങളുടെ അക്കൗണ്ട് ഉടമകൾക്കാണ് സ്റ്റേറ്റ് ബാങ്ക് ഓഫ് ഇന്ത്യ മുന്നറിയിപ്പ് നൽകിയത്. ” ഇന്ത്യയിലെ പ്രധാന നഗരങ്ങളിൽ സൈബർ ആക്രമണം നടക്കുമെന്ന് ഞങ്ങളുടെ ശ്രദ്ധയിൽപ്പെട്ടു. Ncov2019@gov.in ൽ നിന്ന് വരുന്ന ഇമെയിലുകളിൽ ക്ലിക്കുചെയ്യുന്നതിൽ നിന്ന് ദയവായി സ്വയം വിട്ടുനിൽക്കുക,” സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) തങ്ങളുടെ അക്കൗണ്ട് ഉടമകൾക്ക് ട്വീറ്റിലൂടെ മുന്നറിയിപ്പ് നൽകി. സൗജന്യ കൊറോണ പരിശോധന എന്ന പേരിലാണ് ഇത്തരം മെയിലുകൾ വരുന്നതെന്നും ബാങ്ക് വ്യക്തമാക്കുന്നു
ncov2019@gov.in പോലെയുളള മെയിൽ ഐഡികൾ ഉപയോഗിച്ചാണ് സൈബർ ആക്രമണം എന്നാണ് ബാങ്ക് നൽകുന്ന മുന്നറിയിപ്പ്. ഫിഷിംഗ് ആക്രമണത്തിലൂടെ, ദശലക്ഷക്കണക്കിന് ഇന്ത്യക്കാരെ വ്യാജ ഇമെയിലുകൾ, സോഷ്യൽ മീഡിയ പോസ്റ്റുകൾ അല്ലെങ്കിൽ ടെക്സ്റ്റ് സന്ദേശങ്ങൾ എന്നിവ ഉപയോഗിച്ച് കുറ്റവാളികൾ ടാർഗറ്റുചെയ്തേക്കാമെന്ന് ഇന്ത്യൻ കമ്പ്യൂട്ടർ എമർജൻസി റെസ്‌പോൺസ് ടീം (സി‌ഇആർ‌ടി-ഇൻ) ഞായറാഴ്ച മുന്നറിയിപ്പ് നൽകിയിരുന്നു. ഇതിന്റെ പശ്ചാത്തലത്തിലാണ് എസ്ബിഐ മുന്നറിയിപ്പ് നൽകിയത്.
