കൊൽക്കോത്ത: ദുരന്തം വിതച്ച യാസ് ചുഴലിക്കാറ്റിലുണ്ടായ നാശനഷ്ടങ്ങള്‍ വിലയിരുത്താന്‍ പശ്ചിമബംഗാളില്‍ എത്തിയ പ്രധാനമന്ത്രി നരേന്ദ്രമോദി വിളിച്ച അവലോകന യോഗത്തില്‍ നിന്ന് മുഖ്യമന്ത്രി മമത ബാനര്‍ജി വിട്ടുനിന്നു. സ്ഥിതിഗതികള്‍ വിലയിരുത്താനാണ് പ്രധാനമന്ത്രി ബംഗാളില്‍ എത്തിയത്. കലൈക്കു നയിൽ വിളിച്ച അവലോകനയോഗത്തിൽ ഗവർണർ ജഗദീഷ് ധങ്കറിനെയും മുഖ്യമന്ത്രി മമതാ ബാനർജിയും ക്ഷണിച്ചിരുന്നു.
അരമണിക്കൂർ വൈകി യോഗത്തിലെത്തിയ മമത സംസ്ഥാനത്തെ നാശനഷ്ടങ്ങൾ സംബന്ധിച്ച റിപ്പോർട്ട് പ്രധാനമന്ത്രിക്ക് നൽകിയ ശേഷം സംസ്ഥാന ഉദ്യോഗസ്ഥരോടൊപ്പം മടങ്ങി. നാശനഷ്ടങ്ങളുടെ വിശദാംശങ്ങള്‍ അടങ്ങുന്ന രേഖ പ്രധാനമന്ത്രിക്ക് കൈമാറിയതായി മമത ബാനര്‍ജി അറിയിച്ചു.
ഏപ്രില്‍- മെയ് നിയമസഭ തെരഞ്ഞെടുപ്പിന് ശേഷം ആദ്യമായാണ് ഇവര്‍ കൂടിക്കാഴ്ച നടത്തിയത്. അരമണിക്കൂര്‍ നേരം മമതയ്ക്ക് വേണ്ടി മോദി കാത്തുനിന്നതായാണ് റിപ്പോര്‍ട്ടുകള്‍. കൂടിക്കാഴ്ച പതിനഞ്ച് മിനിറ്റ് വരെ മാത്രമേ നീണ്ടുനിന്നുളളൂവെന്ന് മമത ബാനര്‍ജി പറഞ്ഞു. സംസ്ഥാനത്തിന്റെ നാശനഷ്ടങ്ങള്‍ വിലയിരുത്താന്‍ വിളിച്ച യോഗത്തെ കുറിച്ച് അറിയിലെന്നായിരുന്നു മമത ബാനര്‍ജിയുടെ വിശദീകരണം.
പശ്ചിമ മിഡ്‌നാപൂരിലെ കലൈകുന്ദ എയര്‍ബേസില്‍ വച്ചായിരുന്നു കൂടിക്കാഴ്ച. ‘അവിടെ വച്ച് നാശനഷ്ടങ്ങളുടെ വിശദാംശങ്ങള്‍ അടങ്ങുന്ന രേഖ കൈമാറി. 15 മിനിറ്റ് നേരം മാത്രമേ ചെലവഴിച്ചുള്ളൂ. അവിടെ അവലോകനയോഗത്തിന് പോയതല്ല ഞാന്‍. അവലോകനയോഗം വിളിച്ച കാര്യം ഞങ്ങള്‍ അറിഞ്ഞിട്ടില്ല. സുന്ദര്‍ബെന്‍ വികസനം അടക്കം രണ്ടു പദ്ധതികള്‍ക്കായി 20,000 കോടി രൂപയുടെ പാക്കേജ് അനുവദിക്കണമെന്ന് കേന്ദ്രത്തോട് ആവശ്യപ്പെട്ടു’- മമത ബാനര്‍ജി പറഞ്ഞു.
നിരവധി യോഗങ്ങളില്‍ പങ്കെടുക്കാന്‍ ഉണ്ടെന്ന് പറഞ്ഞ് അവലോകന യോഗത്തില്‍ പങ്കെടുക്കാതെ മമത ബാനര്‍ജി മടങ്ങിയെന്നാണ് റിപ്പോര്‍ട്ടുകള്‍. ചുഴലിക്കാറ്റ് ബാധിത പ്രദേശങ്ങളുടെ ആകാശനിരീക്ഷണം ഇരുവരും പ്രത്യേകമായാണ് നടത്തിയത്.
യാസ് ചുഴലിക്കാറ്റ് നാശം വിതച്ച ഒഡിഷയും പശ്ചിമബംഗാളും പ്രധാനമന്ത്രി നരേന്ദ്രമോദി സന്ദർശിച്ചു. ഒഡിഷയിലും ബംഗാളിലെയും ദുരന്തബാധിത മേഖലകളിൽ ആകാശനിരീക്ഷണം നടത്തിയശേഷമാണ് പ്രധാനമന്ത്രി ബംഗാളിൽ എത്തിയത്. യോഗത്തിൽ നിന്നും വിട്ടുനിന്ന മമതയുടെ നിലപാട് സംസ്ഥാനത്തെയും ജനാധിപത്യത്തെയും താത്പര്യങ്ങൾക്ക് വിരുദ്ധമെന്ന് ഗവർണർ ജഗ്‌ദീപ് ധങ്കർ വിമർശിച്ചു. ദുരന്തനിവാരണ പ്രവർത്തനങ്ങൾക്കായി ഒഡിഷക്ക് 500 കോടി രൂപയും, ബംഗാളിനും ഝാർഖണ്ഡിലും ആയി 500 കോടി രൂപയുടെയും അടിയന്തര സാമ്പത്തിക പാക്കേജ് പ്രധാനമന്ത്രി പ്രഖ്യാപിച്ചു.
