ആലപ്പുഴ: ജില്ലയിലെ തെരഞ്ഞെടുപ്പിലെ യുഡിഎഫിൻ്റെ കനത്ത തോൽവിക്ക് പിന്നാലെ ആലപ്പുഴ ജില്ലാ കോൺഗ്രസ് അധ്യക്ഷ സ്ഥാനം രാജിവെച്ച് എം. ലിജു. പരാജയത്തിന്‍റെ ഉത്തരവാദിത്വം ഏറ്റെടുത്താണ് രാജി. അമ്പലപ്പുഴയിൽ മൽസരിച്ച ലിജുവും പതിനായിരത്തിലേറെ വോട്ടുകൾക്കാണ് പരാജയപ്പെട്ടത്.
ലിജുവിൻ്റെ മൂന്നാമത്തെ മൽസരമായിരുന്നു ഇത്തവണത്തേത്. മുമ്പ് ഒരു തവണ കായംകുളത്തും 2016ൽ അമ്പലപ്പുഴയിലുമായിരുന്നു ലിജു മൽസരിച്ച് പരാജയപ്പെട്ടത്. ഹൈക്കമാൻഡ് പ്രത്യേക അനുമതി നൽകിയാണ് ഇക്കുറി ലിജുവിനെ മൽസരിപ്പിച്ചത്.
ആലപ്പുഴയിലെ ഒമ്പത് മണ്ഡലങ്ങളിൽ എട്ടിടത്തും യുഡിഎഫ് പരാജയപ്പെട്ടിരുന്നു. ഹരിപ്പാട്ട് പ്രതിപക്ഷ നേതാവ് രമേശ് ചെന്നിത്തല മാത്രമാണ് പിടിച്ചു നിന്നത്. ഏറ്റവും കുറവ് ഭൂരിപക്ഷത്തിൽ യുഡിഎഫ് സ്ഥാനാർഥികൾ തോറ്റത് കായംകുളത്തും കുട്ടനാട്ടിലുമായിരുന്നു.
