തിരുവനന്തപുരം: കൊറോണ വ്യാപനം രൂക്ഷമാകുന്ന പശ്ചാത്തലത്തിൽ യുദ്ധകാല അടിസ്ഥാനത്തിൽ ആധുനിക ഗ്യാസ് ശ്മശാനം ഒരുക്കിയിട്ടുണ്ടെന്നത് വികസന നേട്ടമായി അവകാശപ്പെട്ട് തിരുവനന്തപുരം മേയർ ആര്യ രാജേന്ദ്രൻ്റെ പോസ്റ്റ്. സംഭവം വിവാദമായതോടെ പോസ്റ്റ് പിൻവലിച്ച് മേയർ പിൻ വാങ്ങി.
ഫേസ്ബുക്കിൽ ചിത്രങ്ങളടക്കമാണ് വികസന നേട്ടമായി അറിയിച്ച് പോസ്റ്റിട്ടത്.പോസ്റ്റിൻ്റെ പൂർണരൂപം;
“രാജ്യത്ത് കോവിഡ് വ്യാപനം രൂക്ഷമാകുന്ന പശ്ചാത്തലത്തിൽ തൈക്കാട് ശാന്തികവാടത്തിൽ യുദ്ധകാല അടിസ്ഥാനത്തിൽ നിർമാണം പൂർത്തീകരിച്ച ഗ്യാസ് ശ്മശാനം ഇന്നലെ മുതൽ പ്രവർത്തനം ആരംഭിച്ചു. നിലവിൽ ശാന്തി കവാടത്തിൽ വൈദ്യൂതി, ഗ്യാസ്, വിറക് എന്നീ സംവിധാനങ്ങളാണ് ശവസംസ്ക്കാരത്തിനായി ഉള്ളത്. “
പോസ്റ്റ് വന്നതോടെ ട്രോളർമാർ വിഷയം ഏറ്റെടുത്തു. വിവാദമായതോടെ മേയർ ആര്യയും പിൻവാങ്ങി.
കഴിഞ്ഞ തദ്ദേശ സ്വയംഭരണ തെരഞ്ഞെടുപ്പിൽ തിരുവനന്തപുരം കോർപ്പറേഷൻ മുടവൻമുകൾ വാർഡിൽ നിന്ന് സിപിഎം സ്ഥാനാർഥിയായി മത്സരിച്ചാണ് 21ാം വയസിൽ ആര്യ കൗൺസിലറാകുന്നതും മേയറാകുന്നതും. രാജ്യത്തെ ഏറ്റവും പ്രായം കുറഞ്ഞ മേയറെന്ന പദവിയും ആര്യക്കാണ്. മുതിർന്ന നേതാക്കളുടെ ശൈലിയിൽ അവകാശവാദങ്ങൾ ഉന്നയിക്കാൻ ആര്യ ശ്രമിച്ചത് മുമ്പും വിവാദങ്ങൾക്ക് തിരികൊളുത്തിയിരുന്നു.
