ആലപ്പുഴ: എംഎല്‍എ യു. പ്രതിഭയും ഡിവൈഎഫ്‌ഐയിലെ ഒരു വിഭാഗം നേതാക്കളുമായുള്ള തര്‍ക്കത്തെ തുടർന്ന് കായംകുളത്ത് ഡിവൈഎഫ്‌ഐയില്‍ കൂട്ടരാജി. 21 അംഗ ബ്ലോക്ക് കമ്മിറ്റിയിലെ 19 പേരും രാജിവച്ചു.
ഡിവൈഎഫ്ഐ ആലപ്പുഴ ജില്ലാ നേതൃത്വത്തോട് രാജിയുടെ കാരണങ്ങൾ അന്വേഷിച്ച് റിപ്പോർട്ട് നൽകാൻ ജില്ലാ സെക്രട്ടറി ആർ നാസർ നിർദേശം നൽകി.
അടുത്തിടെ കായംകുളം സിഐ ഡിവൈഎഫ്ഐ ബ്ലോക്ക് വൈസ് പ്രസിഡന്‍റിന്‍റെ വീട്ടില്‍ തോക്കുമായി എത്തി പരിശോധന നടത്തിയതാണ് ഡിവൈഎഫ്ഐ നേതാക്കളെ പ്രകോപിപ്പിച്ചതും പ്രതിഷേധത്തിന് ഇടയാക്കിയതും. സിഐയെ പിന്തുണക്കുന്നത് എംഎല്‍എയാണെന്ന് ഡിവൈഎഫ്ഐ ആരോപിച്ചിരുന്നു.
ഡിവൈഎഫ്ഐ ജില്ലാ കമ്മിറ്റിക്കും സിപിഎം ഏരിയാ കമ്മിറ്റിക്കും പ്രവര്‍ത്തകര്‍ രാജിക്കത്ത് കൈമാറിയതായും റിപ്പോര്‍ട്ടുണ്ട്. അതേസമയം, കൂട്ടരാജിയെക്കുറിച്ച്‌ അന്വേഷിച്ച് റിപ്പോര്‍ട്ട് നല്‍കാന്‍ സിപിഎം ജില്ലാ നേതൃത്വം നിര്‍ദേശം നല്‍കി. ഒരു ബ്ലോക്ക് കമ്മിറ്റിയിലെ രണ്ട് പേരൊഴികെ ബാക്കിയെല്ലാവരും കൂട്ടത്തോടെ രാജി വച്ച സാഹചര്യത്തിൽ എന്താണ് രാജിക്കിടയാക്കിയ കാരണങ്ങളെന്ന് പരിശോധിക്കാനാണ് സിപിഎം നിർദേശം.
രാജിക്കത്ത് ഇങ്ങനെ
”To,
സെക്രട്ടറി, സിപിഐ(എം), കായംകുളം ഏരിയാ കമ്മറ്റി
സഖാവെ,
കായംകുളത്തെ പൊലീസ് നിരന്തരമായി ഡിവൈഎഫ്ഐ സഖാക്കളെ ആക്രമിക്കുകയാണ്. ഇതുമായി ബന്ധപ്പെട്ട് ബ്ലോക്ക് വൈസ് പ്രസിഡന്‍റ് സഖാവ് സാജിദിന്‍റെ വീട്ടിൽ നിരന്തരമായ പ്രശ്നങ്ങളാണ് സിഐയുടെ നേതൃത്വത്തിൽ നടത്തുന്നത്. ഇത് കൂടാതെ എംഎൽഎ ഓഫീസ് സെക്രട്ടറി വിദ്യാസാഗർ, കഴിഞ്ഞ ദിവസം കായംകുളം നഗരസഭയുടെ കമ്മ്യൂണിറ്റി കിച്ചനിൽ വച്ച്, എന്ത് വിലകൊടുത്തും സഃ സാജിദിനെ സിഐ അറസ്റ്റ് ചെയ്യുമെന്ന് പറയുകയുണ്ടായി. അത് സിഐ നടപ്പിലാക്കാൻ ശ്രമിച്ചുകൊണ്ടിരിക്കുന്നു. ഈ സാഹചര്യത്തിൽ സിഐക്കെതിരെ നടപടി സ്വീകരിക്കാൻ പാർട്ടിക്ക് കഴിയാത്തത് ഖേദകരമാണ്. ഈ കാരണത്താൽ താഴെ പറയുന്ന സഖാക്കൾ ഡിവൈഎഫ്ഐ പ്രവർത്തനത്തിൽ നിന്ന് പിൻമാറുകയാണെന്ന് അറിയിക്കുന്നു”
