ന്യൂഡെല്‍ഹി: ഗോവ ഗവർണറായി അഡ്വ പിഎസ് ശ്രീധരന്‍പിള്ളയെ മാറ്റി നിയമിച്ചു. നിലവിൽ മിസോറാം ഗവര്‍ണറായിരുന്നു അദ്ദേഹം. ഹരിബാബു കുംബംപടിയാണ് പുതിയ മിസോറാം ഗവര്‍ണര്‍. കര്‍ണാടകയിലെ പുതിയ ഗവര്‍ണറായി കേന്ദ്രമന്ത്രി തവര്‍ചന്ദ് ഗെലോട്ടിനെയും നിയമിച്ചു. കേന്ദ്ര മന്ത്രിസഭാ പുനസംഘടനയ്ക്ക് മുന്നോടിയായാണ് മാറ്റമെന്നാണ് സൂചന.
മധ്യപ്രദേശില്‍ മംഗുഭായി ചഗന്‍ഭായിയെ ഗവര്‍ണറായി നിയമിച്ചു.ഗുജറാത്തില്‍നിന്നുള്ള പ്രമുഖ ബിജെപി നേതാവാണ് മംഗുഭായി. കാലാവധി പൂര്‍ത്തിയാക്കിയ കര്‍ണാടക ഗവര്‍ണര്‍ വാജുഭായി വാലയ്ക്കു പുതിയ നിയമനം ഇല്ല.
ഹിമാചല്‍ പ്രദേശ് ഗവര്‍ണറായി രാജേന്ദ്രന്‍ വിശ്വനാഥ് ആര്‍ലേക്കറെ നിയിച്ചു. സത്യേന്ദ്ര നാരായണ്‍ ആര്യയെ ത്രിപുരയിലേക്കും രമേശ് ബയസിനെ ഝാര്‍ഖണ്ഡിലേക്കു മാറ്റി. ഹിമാചല്‍ ഗവര്‍ണര്‍ ബന്ദാരു ദത്താത്രേയയെ ഹരിയാനയിലേക്കു മാറ്റി നിയമിച്ചു.
