ഹൈദരാബാദ്: ആന്ധ്രാപ്രദേശിലെ കുർനൂലിൽ മിനിവാനും ട്രക്കും കൂട്ടിയിടിച്ച് 14 പേർ മരിച്ചു. നാല് പേർക്ക് ഗുരുതരമായി പരിക്കേറ്റു. ദേശീയപാത 44ൽ ഇന്ന് രാവിലെയായിരുന്നു അപകടം. ചിറ്റൂർ ജില്ലയിലെ മദനപ്പള്ളിയിൽ നിന്നും രാജസ്ഥാനിലെ അജ്മീറിലേക്ക് പോയ തീർഥാടക സംഘമാണ് അപകടത്തിൽ പെട്ടതെന്ന് പൊലീസ് പറഞ്ഞു.
തീർഥാടകർ സഞ്ചരിച്ച മിനിവാൻ നിയന്ത്രണം വിട്ട് എതിർദിശയിൽ നിന്ന് വന്ന ട്രക്കിൽ ഇടിക്കുകയായിരുന്നു. ഇന്ന് പുലർച്ചെ 3.30നായിരുന്നു അപകടം. എട്ട് സ്ത്രീകളും ഒരു കുഞ്ഞുമടക്കം പതിനാല് പേരും സംഭവ സ്ഥലത്ത് വെച്ച് തന്നെ മരിച്ചു.
പരിക്കേറ്റവരെ പൊലീസും നാട്ടുകാരും ചേർന്ന് സമീപത്തെ സർക്കാർ ആശുപത്രിയിൽ പ്രവേശിപ്പിച്ചു. പരിക്കേറ്റവരുടെ നില ഗുരുതരമാണെന്ന് ഡോക്ടർമാർ അറിയിച്ചു. മിനിവാൻ ഡ്രൈവർ ഉറങ്ങിപ്പോയതോ ടയർ പൊട്ടിയതോ ആകാം അപകടകാരണമെന്നാണ് പൊലീസിൻറെ നിഗമനം.
