പനാജി: ബിജെപി നേതാവും നടിയുമായ സൊണാലി ഫോഗട്ട് (42) അന്തരിച്ചു. ഇന്നലെ രാത്രി ഗോവയില്‍ വെച്ച് ഹൃദയാഘാതത്തെത്തുടര്‍ന്നായിരുന്നു അന്ത്യം. ജീവനക്കാര്‍ക്കൊപ്പം ഗോവ സന്ദര്‍ശിക്കുന്നതിനിടെയായിരുന്നു മരണമെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.
2019-ലെ ഹരിയാന തെരഞ്ഞെടുപ്പില്‍ ബിജെപി ടിക്കറ്റില്‍ ആദംപൂര്‍ നിയമസഭാ മണ്ഡലത്തില്‍ നിന്ന് ജനവിധി തേടിയിരുന്നു. അടുത്തിടെ കോണ്‍ഗ്രസ് പാര്‍ട്ടി വിട്ട് ബി.ജെ.പിയിലേക്ക് മാറിയ കുല്‍ദീപ് ബിഷ്‌ണോയിയായിരുന്നു എതിരാളി. സൊണാലിയും കുല്‍ദീപ് ബിഷ്‌ണോയിയും തമ്മില്‍ അടുത്തിടെ കൂടിക്കാഴ്ച നടത്തിയിരുന്നു. ഉപതെരഞ്ഞെടുപ്പില്‍ സൊണാലി സ്ഥാനാര്‍ത്ഥിയാകുമെന്ന അഭ്യൂഹങ്ങള്‍ക്കിടെയാണ് മരണം സംഭവിച്ചത്.
ടിക് ടോക് വീഡിയോകളിലൂടെയാണ് സൊണാലി പ്രശസ്തയായത്. നിരവധി ടെലിവിഷന്‍ സീരിയലുകളില്‍ അഭിനയിച്ചിട്ടുണ്ട്. ബിഗ് ബോസ് 14-ലും സൊണാലി മത്സരാര്‍ത്ഥിയായി എത്തിയിരുന്നു.
