മുംബൈ: അയൽക്കാരന്റെ പീഡനശ്രമത്തിൽനിന്ന് സഹോദരിയെ രക്ഷിച്ചത് 14-കാരൻ. മുംബൈ ജുഹുവിൽ താമസിക്കുന്ന കുട്ടിയാണ് ആറുവയസ്സുള്ള സഹോദരിയെ കൃത്യമായ ഇടപെടലിലൂടെ രക്ഷപ്പെടുത്തിയത്. കഴിഞ്ഞദിവസമായിരുന്നു സംഭവം. പെൺകുട്ടിയെ പീഡിപ്പിക്കാൻ ശ്രമിച്ച അയൽക്കാരനെ പോലീസ് പിന്നീട് അറസ്റ്റ് ചെയ്തു.
പകൽസമയത്ത് 14-കാരനും ആറ് വയസ്സുള്ള സഹോദരിയും മാത്രമാണ് വീട്ടിലുണ്ടായിരുന്നത്. ഇരുവരും ടി.വി. കണ്ടുകൊണ്ടിരിക്കുന്നതിനിടെ കേബിൾ കണക്ഷനിൽ തകരാറുണ്ടായി. ഇത് പരിഹരിക്കാൻ സഹായം തേടി പെൺകുട്ടി അയൽക്കാരനായ 45-കാരന്റെ വീട്ടിലെത്തി. എന്നാൽ വീട്ടിലെത്തിയ പെൺകുട്ടിയെ ഇയാൾ പീഡിപ്പിക്കാൻ ശ്രമിക്കുകയായിരുന്നു.
അയൽക്കാരൻ മോശമായി പെരുമാറിയതോടെ പെൺകുട്ടി ഉറക്കെ കരഞ്ഞു. സഹോദരിയുടെ കരച്ചിൽ കേട്ടതോടെ 14-കാരനും ഇവിടേക്ക് കുതിച്ചു. തുടർന്ന് സഹോദരിയെ അയൽക്കാരന്റെ വീട്ടിൽനിന്ന് രക്ഷപ്പെടുത്തി സ്വന്തം വീട്ടിലേക്ക് കൊണ്ടുവരികയായിരുന്നു. മാതാപിതാക്കൾ തിരികെ എത്തിയതോടെ ഇരുവരും നടന്ന സംഭവങ്ങളെല്ലാം തുറന്നുപറഞ്ഞു. തുടർന്ന് മാതാപിതാക്കൾ ജുഹു പോലീസിൽ പരാതി നൽകുകയായിരുന്നു.
പെൺകുട്ടിയുടെ കുടുംബത്തിന്റെ പരാതിയിൽ അതിവേഗത്തിലാണ് പോലീസ് അന്വേഷണം നടത്തിയത്. സ്ഥലത്തുനിന്ന് രക്ഷപ്പെടുന്നതിന് മുമ്പേ പ്രതിയെ പിടികൂടാനായെന്ന് പോലീസ് പറഞ്ഞു. സഹോദരിയെ പീഡനശ്രമത്തിൽനിന്ന് രക്ഷിച്ച 14-കാരനെ പോലീസ് അഭിനന്ദിക്കുകയും ചെയ്തു.
