ന്യൂഡെല്‍ഹി: ധനമന്ത്രി നിർമലാ സീതാരാമൻ അവതരിപ്പിച്ച കേന്ദ്രബജറ്റ് പ്രതിരോധവകുപ്പിന് വകയിരുത്തിയത് റെക്കോർഡ് തുക. കഴിഞ്ഞ തവണത്തേക്കാൾ 19 ശതമാനം വർധനയാണ് ഈ ബജറ്റിൽ പ്രതിരോധ മന്ത്രാലയത്തിന് ലഭിച്ചിരിക്കുന്നത്. പ്രതിരോധമന്ത്രാലയത്തിന് റെക്കോർഡ് തുക വകയിരുത്തിയതിന് പ്രധാനമന്ത്രി നരേന്ദ്രമോദിക്കും ധനമന്ത്രി നിർമലാ സീതാരാമനും നന്ദി പറയുന്നതായി പ്രതിരോധമന്ത്രി രാജ്നാഥ് സിംഗ് ട്വിറ്ററിൽ കുറിച്ചു.
ഇന്ത്യയിൽ സാമ്പത്തിക പരിഷ്കരണം നടപ്പാക്കാനും കൂടുതൽ തൊഴിലവസരങ്ങൾ ഉണ്ടാക്കാനും മൂലധന രൂപീകരണത്തിനും കേന്ദ്ര ബജറ്റ് സഹായിക്കുമെന്നും അദ്ദേഹം അഭിപ്രായപ്പെട്ടു. 4.78 ലക്ഷം രൂപ പ്രതിരോധ മന്ത്രാലയത്തിലെ വിവിധ സേനാവിഭാഗങ്ങൾക്കും ഏജൻസികൾക്കും പദ്ധതികൾക്കുമായി ധനമന്ത്രി വകയിരുത്തിയിട്ടുണ്ട്. ഇതിൽ 1.35 ലക്ഷം കോടി രൂപ മൂലധന ചിലവിനായിട്ടാണ് വകയിരുത്തിയിട്ടുള്ളത്.
അതേസമയം രാജ്യത്തെ സമഗ്ര മേഖലകളെയും ഉള്‍ക്കൊള്ളുന്ന ബജറ്റാണ് ധനമന്ത്രി നിര്‍മലാ സീതാരാമന്‍ അവതരിപ്പിച്ചതെന്ന് പ്രധാനമന്ത്രി നരേന്ദ്ര മോദി പറഞ്ഞു. ബജറ്റിന് ശേഷം രാജ്യത്തെ അഭിസംബോധന ചെയ്യുകയായിരുന്നു അദ്ദേഹം. ആരോഗ്യമേഖലയ്ക്ക് ഊന്നല്‍ നല്‍കുന്ന ബജറ്റ് കര്‍ഷകര്‍ക്കും സൂക്ഷ്മ ചെറുകിട ഇടത്തരം വ്യവസായങ്ങള്‍ക്കും കരുത്താകുമെന്നും നരേന്ദ്ര മോദി പ്രതികരിച്ചു.
ബജറ്റിലൂടെ ഗുണകരമായി മാറ്റങ്ങള്‍ രാജ്യത്തിനുണ്ടാകും. സാമ്ബത്തിക വളര്‍ച്ചയെ ത്വരിതപ്പെടുത്തും. കാര്‍ഷിക മേഖലയെ ശക്തിപ്പെടുത്തും. ഇന്ത്യയുടെ ആത്മവിശ്വാസം വര്‍ധിപ്പിക്കും. പുതിയ അവസരങ്ങള്‍ സൃഷ്ടിക്കുമെന്നും മോദി പറഞ്ഞു.
