ബംഗളൂരു: നഗരത്തിൽ മലയാളി യുവാവിൻ്റെ ഇരുചക്രവാഹനം നാലംഗ കവർച്ച സംഘം തട്ടിയെടുത്തു. കോഴിക്കോട് നാദാപുരം തിനൂർ സ്വദേശിയും ബാനസ്വാടിയിലെ സൂപ്പർമാർക്കറ്റിലെ ജീവനക്കാരനുമായ വണ്ണത്താം കണ്ടി ബിലാലിൻ്റെ (20) സ്കൂട്ടറാണ് അക്രമികൾ കത്തിമുനയിൽ ഭീഷണിപ്പെടുത്തി കവർന്നത്.
വെള്ളിയാഴ്ച അർധരാത്രി 12 മണിയോടെ ഹെന്നൂർ പൊലീസ് സ്റ്റേഷന് 500 മീറ്റർ അകലെ പ്രധാന റോഡിലാണ് സംഭവം. ഒന്നര മാസം മുമ്പാണ് ബിലാൽ ജോലിയിൽ പ്രവേശിച്ചത്. വെള്ളിയാഴ്ച രാത്രി സൂപ്പർമാർക്കറ്റ് അടച്ചശേഷം നാട്ടിൽനിന്നെത്തിയ രണ്ട് സുഹൃത്തുക്കളുമായി ബിലാൽ മറ്റൊരു സുഹൃത്തിനെ കാണാൻ രണ്ട് ബൈക്കുകളിലായി പോകുമ്പോഴാണ് സംഭവം.
ബിലാലിൻ്റെ കെ.എൽ 18 വൈ 2154 രജിസ്ട്രേഷനിലുള്ള സുസുകി ആക്സസ് മോഡൽ പുതിയ സ്കൂട്ടർ സുഹൃത്തുക്കളാണ് ഓടിച്ചിരുന്നത്. ഹെന്നൂരിൽവെച്ച് വഴിമാറി മൂവരും രണ്ട് റോഡിലായി. സുഹൃത്തുക്കൾ ഒാടിച്ച സ്കൂട്ടറിലെ പെട്രോൾ തീർന്നതോടെ ഹെന്നൂർ മെയിൻ റോഡിൽ നിർത്തി. ഈ സമയം അവിടെ സംശയാസ്പദമായ സാഹചര്യത്തിൽ ഒരു ഓട്ടോറിക്ഷ ഡ്രൈവർ ഇവരെ നിരീക്ഷിച്ചിരുന്നതായി യുവാക്കൾ പറഞ്ഞു.
