ന്യൂഡെൽഹി: ജമ്മു കശ്മീരിലെ ബാരാമുള്ളയിൽ പാക്കിസ്ഥാൻ സൈനികരുടെ ഭാഗത്ത് നിന്നുള്ള വെടിവെയ്പ്പിൽ വീരമൃത്യു വരിച്ച ജവാന്മാരുടെ എണ്ണം മൂന്നായി. ഇന്ത്യയുടെ തിരിച്ചടിയിൽ ഏഴ് പാക് സൈനികർ കൊല്ലപ്പെട്ടെന്ന് ഇന്ത്യൻ സൈനിക വൃത്തങ്ങൾ അറിയിച്ചു. മൂന്ന് ഗ്രാമീണരും കൊല്ലപ്പെട്ടു. ആറ് പേർക്ക് പരിക്കേറ്റു.
ഇന്ത്യ ശക്തമായി തിരിച്ചടിച്ചുവെന്നാണ് മേഖലയിൽ നിന്ന് ലഭിക്കുന്ന വിവരം. നിരവധി പാക് ആർമി ബങ്കറുകളും ഇന്ധനം നിറയ്ക്കുന്ന സ്ഥലവും ലോഞ്ച്പാഡുകളും നശിപ്പിച്ച്‌ തീയിട്ടു. ബാരാമുള്ളയിലെ നംബ്ല സെക്ടറിൽ രണ്ട് സൈനികർ കൊല്ലപ്പെട്ടു.
ഹാജിപിർ സെക്ടറിൽ ബിഎസ്‌എഫ് സബ് ഇൻസ്പെക്ടർ കൊല്ലപ്പെടുകയും ഒരു ജവാന് പരിക്കേൽക്കുകയും ചെയ്തു. ബാരാമുള്ള ഉറിയിൽ കമാൽകോട്ടെ സെക്ടറിൽ രണ്ട് ഗ്രാമീണരാണ് മരിച്ചത്. ഉറിയിലെ ഹാജി പിർ സെക്ടറിലെ ബാൽക്കോട്ട് പ്രദേശത്ത് ഒരു സ്ത്രീ മരിച്ചു. ഇന്ത്യ ശക്തമായി തിരിച്ചടിച്ചു. രണ്ട് കമാൻഡോകൾ ഉൾപ്പെടെ ഏഴോളം പാക് പട്ടാളക്കാർ കൊല്ലപ്പെട്ടെന്ന് സൈന്യം അറിയിച്ചു.
