ന്യൂഡെൽഹി: കാമുകിയുടെ സഹോദരനെ വെടിവെച്ചു കൊന്ന സംഭവത്തിൽ പ്രമുഖ യൂട്യൂബർ അറസ്റ്റിൽ. യൂട്യൂബില്‍ ഒന്‍പത്‌ ലക്ഷം സബ്‌സ്‌ക്രൈബർമാരുള്ള നോയിഡയിലെ ബൈക്ക് സ്റ്റണ്ടർ കൂടിയായ പ്രമുഖ യുട്യൂബറാണ് അറസ്റ്റിലായത്. നിസാമുൽ ഖാൻ എന്നയാളാണ് കാമുകിയുടെ സഹോദരനെ കൊലപ്പെടുത്തിയ കേസില്‍ അറസ്റ്റിലായത്.
പ്രണയബന്ധം എതിർത്ത പെൺകുട്ടിയുടെ സഹോദരൻ കമാല്‍ ശര്‍മ(26)യെയാണ് ഇയാൾ കൊലപ്പെടുത്തിയത്. കൃത്യം നടത്താൻ നിസാമുൽ ഖാനെ സഹായിച്ച മറ്റു രണ്ടു പേരും അറസ്റ്റിലായിട്ടുണ്ട്. സഹോദരിയുമായുള്ള പ്രണയ ബന്ധത്തെ ചൊല്ലി കമാൽ ശർമ നിസാമുൽ ഖാനെ മർദ്ദിക്കുകയും മൊബൈൽ ഫോൺ തട്ടിയെടുക്കുകയും ചെയ്തതായും പറയപ്പെടുന്നു.
ഒക്ടോബർ 28ന് നോയിഡയിലെ ഇസ്കോൺ ക്ഷേത്രത്തിന് സമീപത്തു വെച്ച് നിസാമുൽ ഖാന്‍ കമാൽ ശർമയെ പിന്നിൽ നിന്ന് വെടിവെക്കുകയും ബൈക്കിൽ സ്ഥലം വിടുകയുമായിരുന്നു. ഉടനെ ആശുപത്രിയിൽ എത്തിച്ചെങ്കിലും രാത്രിയോടെ കമാൽ ശർമ മരിച്ചു.
ബൈക്ക് ഉപയോഗിച്ചുളള അഭ്യാസപ്രകടനങ്ങള്‍ യൂട്യൂബിൽ പോസ്റ്റ്‌ ചെയ്‌ത് ആരാധകരെ സൃഷ്ടിച്ചയാളാണ് നിസാമുൽ ഖാന്‍. ഇയാളുടെ വിഡിയോകൾക്ക് ലക്ഷക്കണക്കിന്‌ കാഴ്‌ചക്കാരാണുള്ളത്.
