ശ്രീനഗര്‍: ജമ്മു കശ്മീരില്‍ ശനിയാഴ്ച രാത്രി മുതല്‍ ആരംഭിച്ച ഏറ്റുമുട്ടലില്‍ മൂന്ന് ഭീകരരെ സുരക്ഷാ സേന വധിച്ചു. ഒരു സുരക്ഷാ ഉദ്യോഗസ്ഥന് ജീവന്‍ നഷ്ടമായി. ഏറ്റുമുട്ടല്‍ തുടരുകയാണ്.
ജമ്മു കശ്മീരിലെ പന്താചൗക്കില്‍ സിആര്‍പിഎഫും ജമ്മു കശ്മീര്‍ പൊലീസും സംയുക്തമായി നടത്തുന്ന ചെക്ക്‌പോസ്റ്റിന് നേരെ ഭീകരര്‍ വെടിയുതിര്‍ക്കുകയായിരുന്നു. പ്രത്യാക്രമണത്തില്‍ ഇന്നലെ രാത്രിയിലും ഇന്ന് രാവിലെയുമായാണ് ഭീകരരെ വധിച്ചതെന്ന് റിപ്പോര്‍ട്ടുകള്‍ വ്യക്തമാക്കുന്നു. ഭീകരരുടെ ആക്രമണത്തിലാണ് ഒരു പൊലീസുകാരന് ജീവന്‍ നഷ്ടമായത്. ഏറ്റുമുട്ടല്‍ തുടരുകയാണ്.
ഭീകരര്‍ ഒളിച്ചിരിക്കുന്നതായുളള രഹസ്യവിവരത്തിന്റെ അടിസ്ഥാനത്തില്‍ സംയുക്ത സേന തെരച്ചില്‍ നടത്തുന്നതിനിടെയാണ് ഭീകരര്‍ വെടിയുതിര്‍ത്തത്. ഇത് ഏറ്റുമുട്ടലില്‍ കലാശിക്കുകയായിരുന്നു. വെളളിയാഴ്ച മുതല്‍ വ്യത്യസ്തമായ ഏറ്റുമുട്ടലുകളില്‍ ഇതുവരെ 10 ഭീകരരെ വധിച്ചതായി സുരക്ഷാ സേന അറിയിച്ചു.
