മുംബൈ: ആത്മഹത്യ ചെയ്ത ബോളിവുഡ് നടൻ സുശാന്ത് സിംഗ് രാജ്പുതിന്റ കാമുകിയും നടിയുമായ റിയ ചക്രവര്‍ത്തിക്കെതിരെ നാര്‍ക്കോട്ടിക് കണ്‍ട്രോള്‍ ബ്യൂറോ കേസെടുത്തു. എന്‍ഡിപിഎസ് നിയമത്തിലെ 20, 22, 27, 29 വകുപ്പുകള്‍ പ്രകാരമാണ് എന്‍സിബി കേസ് രജിസ്റ്റര്‍ ചെയ്തിട്ടുള്ളത്. റിയ ചക്രബര്‍ത്തി, സഹോദരന്‍ ഷോയിക് ചക്രബര്‍ത്തി, എന്നിവര്‍ക്കെതിരെയാണ് എന്‍സിബി കേസെടുത്തിട്ടുള്ളത്.
റിയയ്ക്ക് മയക്കുമരുന്ന് ഇടപാടുകള്‍ ഉണ്ടെന്ന വിവരത്തിന്റെ അടിസ്ഥാനത്തിലാണ് കേസ്. എന്‍ഫോഴ്സ്മെന്റ് ഡയറക്ടര്‍ സഞ്ജയ് മിശ്ര നല്‍കിയ വിവരങ്ങള്‍ ഉള്‍പ്പെട്ട കത്തിന്റെ അടിസ്ഥാനത്തിലാണ് കേസ്.
ഡെപ്യൂട്ടി ഡയറക്ടര്‍ ഓഫ് ഓപ്പറേഷന്‍സ് (എന്‍സിബി) കെപിഎസ് മല്‍ഹോത്രയുടെ നേതൃത്വത്തിലുള്ള സംഘമാണ് കേസിന് നേതൃത്വം വഹിക്കുന്നത്. മൂന്ന് അംഗങ്ങളുള്ള ഡൽഹി ടീമും മുംബൈ ടീമിനൊപ്പം പ്രവര്‍ത്തിക്കും. റിയ, ഷോയിക് ജയ സാഹ എന്നിവരെ കൂടാതെ, ശ്രുതി മോദി, ഗൗരവ് ആര്യ എന്നിവരും പൂനെ ആസ്ഥാനമായുള്ള മയക്കുമരുന്ന് പെഡലര്‍ ജിഒഎയില്‍ സജീവമാണ് എന്നാണ് വിവരം.
സുശാന്തിന്റെ മരണവുമായി ബന്ധപ്പെട്ട കേസില്‍ റിയക്കെതിരെ എന്‍ഫോഴ്സ്മെന്റ് ഡയറക്ടറേറ്റ് (ഇ ഡി) അന്വേഷണം ആരംഭിച്ചിരുന്നു. കേസിന്റെ ഭാഗമായി റിയയെ ഇഡി ചോദ്യം ചെയ്തു. റിയക്ക് നിരോധിത മയക്കുമരുന്നുകളുമായി ബന്ധമുണ്ടെന്ന് ആരോപിക്കാവുന്ന തരത്തിലുള്ള ചില തെളിവുകള്‍ സിബിഐയ്ക്കും എന്‍സിബിക്കും ഇഡി കൈമാറിയിട്ടുണ്ട്.
റിയയുടെ മൊബൈല്‍ ഫോണില്‍ നിന്ന് ജയ സാഹയിലേക്ക് അയച്ച വീണ്ടെടുത്ത വാട്സ്‌ആപ്പ് സന്ദേശങ്ങള്‍ കഴിഞ്ഞ ദിവസം പുറത്ത് വന്നിരുന്നു. ഇതോടെ റിയ ഇടയ്ക്കിടെ എംഡിഎംഎ, മരിജുവാന തുടങ്ങിയ മരുന്നുകള്‍ ഉപയോഗിക്കുന്നുണ്ട് എന്ന് വ്യക്തമാകുകയും ചെയ്തു.
വാട്ട്സ്‌ആപ്പ് ചാറ്റിന്റെ വിശദാംശങ്ങള്‍ അന്വേഷിക്കുന്നതിനും മയക്കുമരുന്ന് വില്‍പ്പനക്കാരെക്കുറിച്ചുള്ള വിവരങ്ങള്‍ കണ്ടെത്തുന്നതിനും അന്വേഷണ സംഘം റിയയേയും മറ്റുള്ളവരെയും ചോദ്യം ചെയ്യാന്‍ സാധ്യതയുണ്ട്. റിയ, സാമുവല്‍ മിറാന്‍ഡ, ജയ സാഹ, ഗൗരവ് ആര്യ എന്നിവരെ ചോദ്യം ചെയ്ത് എന്‍സിബി ടീം അന്വേഷണം ആരംഭിക്കുമെന്ന് വൃത്തങ്ങള്‍ അറിയിച്ചു.
