കൊച്ചി: നിയന്ത്രണമില്ലാതെ ഇന്ധന വില കൂട്ടി എണ്ണക്കമ്പനികൾ. കൊറോണയുടെ ജനങ്ങൾ നട്ടം തിരിയുമ്പോഴാണ് തുടർച്ചയായി എട്ടാം ദിവസവും കേന്ദ്രം നിർദയം ഇന്ധനവില കൂട്ടിയത് . ഒരാഴ്‌ചക്കിടെ പെട്രോൾ ലിറ്ററിന് 4.53 രൂപയും ഡീസലിന് 4.41 രൂപയും കൂട്ടി. ശനിയാഴ്‌ച രാത്രി ഡീസലിന് 60 പൈസയും പെട്രോളിന് 62 പൈസയുമണ്‌ വർധിപ്പിച്ചത്‌. ഇതോടെ തിരുവനന്തപുരത്ത്‌ പെട്രോളിന് ലിറ്ററിന് 76.82 രൂപയും ഡീസലിന് 70.91 രൂപയുമായി.
ഇന്നത്തെ വര്‍ധനയോടെ കൊച്ചിയില്‍ ഒരു ലിറ്റര്‍ പെട്രോളിന് വില 75.92 ആയി. ഡീസല്‍ വില 70.08 രൂപയായി
രാജ്യാന്തരവിപണിയിൽ എണ്ണവിലകൂടിയെന്ന പേരിൽ ഈ മാസം ഏഴുമുതലാണ് വിലകൂട്ടിത്തുടങ്ങിയത്. ജൂൺ ആറിനു രാജ്യാന്തരവിപണിയിൽ എണ്ണവില വീപ്പയ്‌ക്ക്‌ 42 ഡോളറായിരുന്നെങ്കിൽ ജൂൺ12ന് 38 ഡോളറായി കുറഞ്ഞു. എന്നിട്ടും പെട്രോൾ, ഡീസൽവില അനുദിനം കൂട്ടി. ആദ്യ ദിവസം 60 പൈസ കൂട്ടിയതിനു പിന്നാലെ തുടര്‍ച്ചായ ദിവസങ്ങളില്‍ വര്‍ധന വരുത്തുകയായിരുന്നു. ലോക്ക് ഡൗണ്‍ കാലത്ത് പാചക വാതകത്തിന്റെയും വിമാന ഇന്ധനത്തിന്റെയും വില പുനര്‍ നിര്‍ണയിച്ചിരുന്നെങ്കിലും പെട്രോള്‍, ഡീസല്‍ വില നേരത്തെയുള്ളത് തുടരുകയായിരുന്നു.
രാജ്യാന്തര വിപണിയില്‍ അസംസ്‌കൃത എണ്ണയുടെ വില കുത്തനെ ഇടിഞ്ഞെങ്കിലും സര്‍ക്കാര്‍ എക്‌സൈസ് ഡ്യൂട്ടി മൂന്നു രൂപ വര്‍ധിപ്പിച്ചതോടെ അതിന്റെ ഗുണം ഉപഭോക്താക്കള്‍ക്കു ലഭിച്ചില്ല.
