മെക്സിക്കോ സിറ്റി: പിറന്നാള്‍ ആഘോഷിക്കാന്‍ മെക്സിക്കോയില്‍ പോയ ഇന്ത്യന്‍ വംശജയായ ട്രാവല്‍ ബ്ലോഗര്‍ വെടിവെയ്പ്പില്‍ കൊല്ലപ്പെട്ടു. അമേരിക്കയിലെ കാലിഫോര്‍ണിയയില്‍ താമസിക്കുന്ന അഞ്ജലി റയോട്ടാണ് കൊല്ലപ്പെട്ടത്. മെക്സിക്കോയില്‍ ഒരു റസ്റ്റോറന്റില്‍ വെച്ച് ലഹരി സംഘങ്ങള്‍ തമ്മിലുള്ള വെടിവയ്പ്പിനിടയിലാണ്സംഭവം. ഇവിടെ ഭക്ഷണം കഴിച്ചുകൊണ്ടിരിക്കുകയായിരുന്നു അഞ്ജലി. ഒരു ജര്‍മാന്‍ വംശജനും കൊല്ലപ്പെട്ടിട്ടുണ്ട്.
25കാരിയാണ് അഞ്ജലി. മെക്സിക്കോയിലെ തുലുമിലെ കരീബിയന്‍ കോസ്റ്റ് റിസോര്‍ട്ടിലായിരുന്നു സംഭവം നടന്നത്. ബുധനാഴ്ച രാത്രിയായിരുന്നു ഇത്. ഹിമാചല്‍ പ്രദേശ് സ്വദേശിയായ അഞ്ജലി അമേരിക്കയില്‍ ഐടി സെക്ടറിലാണ് ജോലി ചെയ്തിരുന്നത്.
ലിങ്കെഡ്‌ഇനില്‍ സീനിയര്‍ സൈറ്റ് റിലയബിലിറ്റി എഞ്ചിനീയറായിരുന്നു ഇവര്‍. ഇതിന് മുന്‍പ് യാഹൂവിലും കാലിഫോര്‍ണിയ ന്യൂസ് ടൈംസ് എന്ന വെബ്സൈറ്റിലും ഇവര്‍ ജോലി ചെയ്തിരുന്നു. ബുധനാഴ്ച രാത്രി റെസ്റ്റോറന്റില്‍ വെച്ച് ഭക്ഷണം കഴിച്ചുകൊണ്ടിരിക്കെ അഞ്ജലി അടങ്ങുന്ന വിദേശ ടൂറിസ്റ്റ് സംഘത്തിന് നേരെ നാലംഗ സായുധ സംഘം വെടിയുതിര്‍ക്കുകയായിരുന്നു. അഞ്ജലിക്ക് ഒപ്പമുണ്ടായിരുന്ന ജര്‍മ്മനിയില്‍ നിന്നും നെതര്‍ലന്റില്‍ നിന്നുമുള്ള മൂന്ന് ടൂറിസ്റ്റുകള്‍ക്ക് സംഭവത്തില്‍ പരിക്കേറ്റിട്ടുണ്ട്.
