തിരുവന്തപുരം: സംസ്ഥാനത്തെ ലോക്ക് ഡൗൺ മാർഗനിർദ്ദേശങ്ങളിൽ കൂടുതൽ ഇളവുകൾ അനുവദിച്ചു. മൊബൈൽ ഫോണും കമ്പ്യൂട്ടറും അറ്റകുറ്റപ്പണി നടത്തുന്ന കടകൾക്ക് ചൊവ്വ, ശനി ദിവസങ്ങളിൽ പ്രവർത്തിക്കാൻ അനുമതി നൽകി ഉത്തരവിറക്കി. മലപ്പുറം ഒഴികെയുള്ള ജില്ലകളിലാണ് ഇളവുകൾ ബാധകം.
ഗ്യാസ് സ്റ്റൗ അറ്റകുറ്റപ്പണി നടത്തുന്ന കടകൾ, കണ്ണടകൾ, ശ്രവണ സഹായികൾ, കൃത്യമക്കാലുകൾ എന്നിവയുടെ വില്പനയും അറ്റകുറ്റപ്പണിയും നടത്തുന്ന കടകൾക്കും ചൊവ്വാഴ്ചയും ശനിയാഴ്ചയും തുറക്കാം. ചകിരി ഉപയോഗിച്ച് കയർ നിർമിക്കുന്ന യന്ത്രങ്ങൾ കേടുകൂടാതെ സൂക്ഷിക്കാൻ ചൊവ്വ, ശനി ദിവസങ്ങളിൽ അവ ഉപയോഗിക്കാനും അനുമതി നൽകി. വിമണ്‍ ഹൈജീൻ സാധനങ്ങൾ വില്പന സ്ഥലങ്ങളിൽ എ ത്തിക്കുന്ന വാഹനങ്ങൾക്കും അനുമതി നല്കിയിട്ടുണ്ട്.
നാളെ മുതൽ ഇളവ് പ്രാബല്യത്തിൽ വരും. ഇത് സംബന്ധിച്ച ഉത്തരവ് പുറത്തിറങ്ങി.
സംസ്ഥാനത്ത് നിയന്ത്രണങ്ങളുടെ ഫലം കണ്ട് തുടങ്ങിയിട്ടുണ്ട്. പ്രതിദിന കേസുകളും ടെസ്റ്റ് പോസിറ്റിവിറ്റി റേറ്റും മെല്ലെ കുറയുന്നുണ്ട്. ഇന്ന് 22,318 പേർക്കാണ് രോഗം സ്ഥിരീകരിച്ചത്. 16.4 ആണ് ടെസ്റ്റ് പോസിറ്റിവിറ്റി നിരക്ക്. 24 മണിക്കൂറിനിടെ 1,36,068 സാമ്പിളുകളാണ് പരിശോധിച്ചത്.
