ന്യൂയോർക്ക്: ന്യൂയോർക്കിൽ പള്ളിയിൽ ക്രിസ്മസ് കരോളിനെത്തിയ ആളുകൾക്കു നേരെ വെടിവയ്പ്. അക്രമിയെ പോലീസ് വധിച്ചു. ഞായറാഴ്ച വൈകുന്നേരം നാലിന് മാൻഹട്ടനിലെ സെന്‍റ് ജോൺ ദ് ഡിവൈൻ കത്തീഡ്രലിലായിരുന്നു സംഭവം.
ക്രിസ്മസ് കരോളിൽ സംബന്ധിക്കാൻ തടിച്ചുകൂടിയ ജനക്കൂട്ടത്തിനു നേർക്കായിരുന്നു അക്രമി വെടിയുതിർത്തത്. കത്തീഡ്രലിന്‍റെ പടികളിൽ നിന്ന് അക്രമി വെടിയുതിർത്തതോടെ ആളുകൾ ചിതറിയോടി. ആക്രമണത്തിൽ ആർക്കും പരിക്കേറ്റില്ല. പോലീസുമായുണ്ടായ ഏറ്റുമുട്ടലിൽ അക്രമി കൊല്ലപ്പെട്ടു.
പോലീസ് വെടിവയ്പിൽ ഗുരുതര പരിക്കേറ്റ അക്രമിയെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പോലീസ് വെടിവച്ചു വീഴ്ത്തുന്നതിനു മുൻപ് അക്രമി എട്ടു തവണയോളം വെടിയുതിർത്തു. ആരെയും ലക്ഷ്യം വയ്ക്കാതെയായിരുന്നു ഇയാൾ വെടിയുതിർത്തത്. “എന്നെ വെടിവയ്ക്കുക, കൊല്ലുക’ എന്ന് ഇയാൾ ആക്രോശിച്ചെന്നും ദൃക്സാക്ഷികൾ പറയുന്നു.
