ധാക്ക: ബംഗ്ലാദേശിലുണ്ടായ ബോട്ടപകടത്തെ തുടർന്ന് 25 പേർ മരിച്ചു. യാത്രാ ബോട്ട് കപ്പലുമായി കൂട്ടിയിടിച്ച് തകരുകയായിരുന്നുവെന്നാണ് റിപ്പോർട്ട്. രാജ്യത്തെ ഏറ്റവും വലിയ നദീ തുറമുഖമായ ധാക്കയ്ക്ക് സമീപത്തെ സദര്‍ഘട്ടിലാണ് രാജ്യത്തെ നടുക്കിയ അപകടമുണ്ടായത്. മോണിംഗ് ബേഡ് എന്ന കപ്പല്‍ ബോട്ടില്‍ ഇടിക്കുകയായിരുന്നു.
കപ്പലിൽ ഇടിച്ച ആഘാതത്തെ തുടർന്ന് കപ്പല്‍ നദിയില്‍ മുങ്ങുകയായിരുന്നു. നിരവധി പേര്‍ക്ക് പരിക്കേല്‍ക്കുകയും നിരവധി പേരെ കാണാതാകുകയും ചെയ്‌തെന്ന് ചില പ്രാദേശീക മാധ്യമങ്ങള്‍ റിപ്പോര്‍ട്ട് ചെയ്തു. ബോട്ടില്‍ അനുവദിച്ചതിനേക്കാള്‍ കൂടുതല്‍ യാത്രക്കാരുണ്ടായിരുന്നതായും സൂചനയുണ്ട്.
ബോട്ടില്‍ അമ്പതിന് മുകളില്‍ യാത്രക്കാരുണ്ടായിരുന്നുവെന്നാണ് വിവരം. കുറച്ച് പേരെ രക്ഷാപ്രവര്‍ത്തര്‍ കരക്കെത്തിച്ചു. കുട്ടികളടക്കം 30 പേരുടെ മൃതദേഹങ്ങള്‍ ലഭിച്ചെന്ന് ദൃക്‌സാക്ഷികളെ ഉദ്ധരിച്ച് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ അധികൃതര്‍ മരണസംഖ്യ സ്ഥിരീകരിച്ചിട്ടില്ല.
