തിരുവനന്തപുരം: കോണ്‍ഗ്രസ് പ്രസിഡന്റ് തെരഞ്ഞെടുപ്പില്‍ മത്സരിക്കാന്‍ ശശി തരൂര്‍ യോഗ്യനെന്ന് കെ.പി.സി.സി പ്രസിഡന്റ് കെ.സുധാകരന്‍. കോണ്‍ഗ്രസ് ജനാധിപത്യ പാര്‍ട്ടിയാണ്. അദ്ദേഹത്തിന് മത്സരിക്കാന്‍ ആഗ്രഹമുണ്ടെങ്കില്‍ മത്സരിക്കട്ടെ. കൂടുതല്‍ വോട്ട് കിട്ടുന്നവര്‍ വിജയിക്കും. ജനാധിപത്യ പ്രക്രിയയിലൂടെ കോണ്‍ഗ്രസ് അധ്യക്ഷനെ കണ്ടെത്തുമെന്നും കെ.സുധാകരന്‍ പറഞ്ഞു.
ഇന്ത്യന്‍ നാഷണല്‍ കോണ്‍ഗ്രസെന്ന ജനാധിപത്യ പാര്‍ട്ടിയില്‍ മത്സരിക്കാന്‍ എല്ലാവര്‍ക്കും അവകാശമുണ്ട്. കെ.സുധാകരനും അവകാശമുണ്ട്. ശശി തരൂരിനും അവകാശമുണ്ട്. ആഗ്രഹമുണ്ടെങ്കില്‍ തനിക്കും മത്സരിക്കാമെന്ന് കെ.സുധാകരന്‍ പറഞ്ഞു. ശശി തരൂര്‍ മത്സരിക്കാന്‍ അര്‍ഹതയുള്ള ആളാണെന്നും സുധാകരന്‍ വ്യക്തമാക്കി.
തെരഞ്ഞെടുപ്പ് കോണ്‍ഗ്രസ് പാര്‍ട്ടിക്ക് ഗുണകരമാകുമെന്ന് ശശി തരൂര്‍ എം.പി നേരത്തെ അഭിപ്രായപ്പെട്ടിരുന്നു. മത്സരരംഗത്തിറങ്ങുമോ എന്ന ചോദ്യത്തിന്, അതേക്കുറിച്ച് ഇപ്പോള്‍ ഒന്നും പറയാനില്ലെന്നായിരുന്നു ശശി തരൂരിന്റെ മറുപടി. മഹത്തായ പാരമ്പര്യമുള്ള കോണ്‍ഗ്രസ് പാര്‍ട്ടിയെ ഒരു കുടുംബത്തിന് മാത്രമേ നയിക്കാനാവൂ എന്ന തരത്തില്‍ വിശ്വാസത്തെ പരിമിതപ്പെടുത്തരുതെന്നും തരൂര്‍ കൂട്ടിച്ചേര്‍ത്തു.
