കോഴിക്കോട്: നിരോധനാജ്ഞ പ്രഖ്യാപിച്ചിരിക്കുന്ന കോഴിക്കോട് ജില്ലയില്‍ ഒരാള്‍ക്ക് കൂടി കോവിഡ്-19 വൈറസ് സ്ഥിരീകരിച്ചു. ഇയാള്‍ കണ്ണൂര്‍ സ്വദേശിയാണെന്നാണ് വിവരം. കൂടുതല്‍ വിവരങ്ങള്‍ അധികൃതര്‍ പുറത്തുവിട്ടിട്ടില്ല. ഇതോടെ ജില്ലയിലെ കൊറോണ ബാധിതരുടെ എണ്ണം മൂന്നായി.
പുതുതായി കൊവിഡ് സ്ഥിരീകരിച്ചയാൾ വിദേശത്ത് നിന്ന് വന്നതാണോ എന്ന കാര്യത്തിൽ ഇതുവരെ വ്യക്തതയില്ല. ജില്ലയില്‍ ആകെ 8408 പേര്‍ നിരീക്ഷണത്തിലുണ്ട്. ഇതില്‍ 263 പേര്‍ പുതുതായി നിരീക്ഷണത്തില്‍ വന്നവരാണ്. മെഡിക്കല്‍ കോളേജില്‍ 17 പേരും ബീച്ച് ആശുപത്രിയില്‍ 19 പേരും ഉള്‍പ്പെടെ ആകെ 36 പേര്‍ ഐസൊലേഷന്‍ വാര്‍ഡില്‍ നിരീക്ഷണത്തിലാണ്. ബീച്ച് ആശുപത്രിയില്‍ നിന്ന് 8 പേരെ ഡിസ്ചാര്‍ജ്ജ് ചെയ്തു.
അതേസമയം ആകെ 190 സാംപിളുകള്‍ പരിശോധനയ്ക്ക് അയച്ചതില്‍ 162 എണ്ണത്തിന്റെ പരിശോധനാ ഫലം ലഭിച്ചു. 158 എണ്ണം നെഗറ്റീവ് ആണ്. 3 പേരുടെ പരിശോധനാഫലം പോസിറ്റീവ് ആണ്. ഇതില്‍ ഒന്ന് കണ്ണൂര്‍ സ്വദേശിയുടേതാണ്. ഇനി 29 പേരുടെ പരിശോധനാ ഫലം മാത്രമേ ലഭിക്കാന്‍ ബാക്കിയുള്ളു.
