കാബൂള്‍: ശരീരം പുറത്ത് കാണുന്നതിനാല്‍ സ്ത്രീകള്‍ സ്‌പോര്‍ട്സില്‍ പങ്കെടുക്കേണ്ടെന്ന് താലിബാന്‍ ഭീകരർ. ഇതോടെ അഫ്ഗാനിസ്ഥാന്റെ വനിതാ ടീമുകള്‍ പിരിച്ചുവിടും എന്ന് ഉറപ്പായിരിക്കുകയാണ്.കായിക പ്രവര്‍ത്തനങ്ങളില്‍ ഏര്‍പ്പെടുമ്പോള്‍ ശരീരം പുറത്ത് കാണുമെന്നതിനാലാണ് വിലക്കെന്നാണ് താലിബാൻ ഭീകരരുടെ വിശദീകരണം. ക്രിക്കറ്റ് ഉള്‍പ്പെടെയുള്ള കായിക മത്സരങ്ങളില്‍ പങ്കെടുക്കാന്‍ സ്ത്രീകള്‍ക്ക് കഴിയില്ലെന്ന് ഇന്ന് പുതിയ അഫ്ഗാനിലെ ഇടക്കാല ഭീകര സര്‍ക്കാര്‍ വെളിപ്പെടുത്തി.
തങ്ങള്‍ മതനിയമങ്ങള്‍ പിന്തുടരും എന്നാണ് താലിബാന്‍ ഭീകര നേതാക്കള്‍ അഭിപ്രായപ്പെട്ടത്. മതനിയമങ്ങള്‍ പാലിച്ചു കൊണ്ട് സ്ത്രീകള്‍ക്ക് വിദ്യാഭ്യാസം നടത്താമെന്ന് താലിബാന്‍ ഭീകരർ നേരത്തേ വ്യക്തമാക്കിയിരുന്നു. പെണ്‍കുട്ടികളെ വനിതാ അദ്ധ്യാപകര്‍ മാത്രമേ പഠിപ്പിക്കുകയുള്ളൂവെന്നും എന്നാല്‍ അത് സാദ്ധ്യമല്ലെങ്കില്‍ നല്ല സ്വഭാവമുള്ള വൃദ്ധരായ പുരുഷന്‍മാര്‍ക്ക് ക്ലാസെടുക്കാനും താലിബാന്‍ ഭീകരർ അനുവദിച്ചിരുന്നു. കഴിഞ്ഞ ദിവസം കര്‍ട്ടന്‍ ഉപയോഗിച്ച്‌ വേര്‍തിരിച്ച ക്ലാസുകളില്‍ ആണ്‍ പെണ്‍കുട്ടികള്‍ ഇരിക്കുന്ന ചിത്രം പുറത്ത് വന്നിരുന്നു.
സ്വകാര്യ അഫ്ഗാന്‍ സര്‍വകലാശാലകളില്‍ പഠിക്കുന്ന സ്ത്രീകള്‍ അബായ വസ്ത്രവും നിഖാബും ധരിക്കണമെന്ന് താലിബാന്‍ ഉത്തരവിറകിയിരുന്നു. 2001 ല്‍ താലിബാൻ്റെ കിരാത ഭരണം അവസാനിച്ചതിനു ശേഷം കൂണുപോലെ വളര്‍ന്ന സ്വകാര്യ കോളേജുകള്‍ക്കും സര്‍വകലാശാലകള്‍ക്കും ഈ ഉത്തരവ് ബാധകമാണ്.
