കൊല്‍ക്കത്ത: ഫുട്‌ബോള്‍ ദൈവം ഡീഗോ മറഡോണയുടെ വിയോഗത്തില്‍ ലോകം കണ്ണീരില്‍ കുതിര്‍ന്നു. ഹൃദയഭേദകമായ പ്രണാമങ്ങളാണ് സോഷ്യല്‍മീഡിയയില്‍ നിറഞ്ഞത്. എന്റെ ഹീറോ ഇനിയില്ല, മുന്‍ ക്രിക്കറ്റ് താരം സൗരവ് ഗാംഗുലിയുടെ വാക്കുകളാണിത്. നിരവധി പ്രമുഖരാണ് അദ്ദേഹത്തിന് അനുശോചനം രേപ്പെടുത്തിയത്.
സൗരവ് ഗാംഗുലിക്ക് ഏറ്റവും പ്രിയപ്പെട്ട ഫുട്‌ബോള്‍ താരമായിരുന്നു മറഡോണ. തന്റെ പ്രൊഫഷന്‍ ക്രിക്കറ്റായിരുന്നെങ്കിലും ഫുട്‌ബോളിനെയും അദ്ദേഹം ചേര്‍ത്ത് നിര്‍ത്തിയിരുന്നു. അദ്ദേഹത്തിന്റെ വിയോഗത്തില്‍ ഗാംഗുലി ദുഃഖം രേഖപ്പെടുത്തി. ഞാന്‍ ഭ്രാന്തമായി ആരാധിച്ചിരുന്ന പ്രതിഭ സമാധാനത്തോടെ വിശ്രമിക്കുകയാണ്. ഞാന്‍ നിങ്ങള്‍ക്കുവേണ്ടിയാണ് ഫുട്‌ബോള്‍ കണ്ടത് എന്നായിരുന്നു ഗാംഗുലി ട്വിറ്ററില്‍ കുറിച്ചത്.
മറഡോണയെക്കുറിച്ച് ഇതിനുമുന്‍പും ഗാംഗുലി വാ തോരാതെ സംസാരിച്ചിട്ടുണ്ട്. ഇന്ത്യയില്‍ മറഡോണ വന്നപ്പോഴെല്ലാം അദ്ദേഹത്തെ കാണാനും ചെന്നിട്ടുണ്ട്. മറഡോണയുടെ വിയോഗത്തില്‍ ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കറും അനുശോചനം രേഖപ്പെടുത്തി.
ഫുട്‌ബോളിനും ലോകത്തിനും അതുല്യനായ താരത്തിനെയാണ് നഷ്ടമായിരിക്കുന്നത്. സമാധാനത്തോടെ വിശ്രമിക്കൂ ഡീഗോ മറഡോണ, നിങ്ങളെ മിസ് ചെയ്യും എന്നായിരുന്നു സച്ചിന്റെ വാക്കുകള്‍.
