സിയൂൾ: ലോകം നേരിടുന്ന വലിയ വെല്ലുവിളിയായ ഇ വേസ്റ്റ് അഥവാ ഇലക്ട്രോണിക് വേസ്റ്റിൻ്റെ സാഹചര്യത്തിൽ ഇലക്ട്രോണിക്സ് ഭീമനായ സാംസങ്ങ് പുതിയൊരു തീരുമാനം പുറത്തുവിടുന്നു. മൊബൈൽ ഫോണുകൾക്ക് ഇനി സൗജന്യമായി ചാർജർ നൽകില്ലെന്നാണ് സാംസങ്ങിന്റെ തീരുമാനം. വീടുകളിൽ ചാർജറുകൾ കുമിഞ്ഞുകൂടുന്നതായും അതിനാൽതന്നെ ചാർജർ നിർബന്ധമില്ലെന്നുമാണ് കമ്പനിയുടെ വിലയിരുത്തൽ. ആവശ്യമുള്ളവർ പണംകൊടുത്ത് വാങ്ങട്ടെ എന്നും സാംസങ്ങ് പറയുന്നു.
സാംസങ്ങിന്റെ പ്രധാന എതിരാളിയായ ആപ്പിളും തങ്ങളുടെ ഐഫോൺ 12 ൽ ചാർജർ ഒഴിവാക്കുമെന്ന് നേരത്തേ പ്രഖ്യാപിച്ചിരുന്നു. സാംസങ്ങ് ഉടൻ തീരുമാനം നടപ്പാക്കാനിടയില്ലെന്നും 2021വരെ നിലവിലെ സ്ഥിതി തുടരുമെന്നും കൊറിയയിലെ ഇടി ന്യൂസ് റിപ്പോർട്ട് ചെയ്യുന്നു.
പുതിയ തീരുമാനത്തിനു പിന്നിൽ ചില സാമ്പത്തിക താൽപ്പര്യങ്ങളും സാംസങ്ങിനുണ്ട്. ചിലവുകുറക്കൽ തന്നെയാണതിൽ പ്രധാനം. കൊറോണ മൂലമുണ്ടായ പ്രതിസന്ധി കൊറിയൻ ഇലക്ട്രോണിക്സ് ഭീമനേയും ബാധിച്ചിട്ടുണ്ട്. ഫൈവ് ജി ഫോണുകൾ നിർമിക്കുന്നതിന് കൂടുതൽ പണം മുടക്കേണ്ട സ്ഥിതിയും നിലവിലുണ്ട്.
ചാർജറുകൾ ഒഴിവാക്കാനുള്ള മറ്റൊരു കാരണം വയർലെസ്സ് ചാർജറുകളുടെ കടന്നുവരവാണ്. സാമ്പത്തികമായി മെച്ചപ്പെട്ട രാജ്യങ്ങളിൽ മിക്ക വീടുകളിലും വയർലെസ്സ് ചാർജറുകളണ്ട്. അവർക്ക് എല്ലാ ഫോണുകൾക്കൊപ്പവും ചാർജർ നൽകേണ്ടതില്ല.
