ന്യൂയോര്‍ക്ക്: തൊണ്ണൂറ് ദിവസത്തിലേറെ പഴക്കമുള്ള വാര്‍ത്തകളാണ് ഷെയര്‍ ചെയ്യാന്‍ ഒരുങ്ങുന്നതെങ്കില്‍ ഫെയ്‌സ്ബുക് മുന്നറിയിപ്പ് നൽകും തങ്ങളുടെ പഴയ വാര്‍ത്തകള്‍ പുതിയതെന്ന രീതിയില്‍ ഫെയ്‌സ്ബുക്കിലൂടെ പ്രചരിക്കുന്നതില്‍ വലിയ പരാതികള്‍ ഉയര്‍ന്ന ഘട്ടത്തിലാണ് ഇത്തരം ഒരു മാറ്റം ഫേസ്ബുക്ക് ആലോചിക്കുന്നത്. ഇത് സംബന്ധിച്ച് ഒരു വീഡിയോ ഫേസ്ബുക്ക് പുറത്തുവിട്ടിട്ടുണ്ട്.
വ്യാജ പ്രചാരണങ്ങള്‍ക്കും വാര്‍ത്തകള്‍ക്കുമെതിരെയുള്ള ഫേസ്ബുക്കിന്‍റെ നടപടികളിലാണ് ഈ പുതിയ ഫീച്ചറും. ഫേസ്ബുക്കില്‍ ഉപയോക്താവ് ഒരു വാര്‍ത്ത കണ്ട് ഷെയര്‍ ചെയ്യാന്‍ പോയാല്‍. പഴയ ലിങ്കാണ് ഷെയർ ചെയ്യാന്‍ ഒരുങ്ങുന്നതെങ്കില്‍ ഫേസ്ബുക്ക് അപ്പോള്‍ തന്നെ മുന്നറിയിപ്പ് നല്‍കും.
വാര്‍ത്ത വന്ന സന്ദര്‍ഭം പരിഗണിക്കാതെയുള്ള ഷെയറിങ് പ്രശ്‌നങ്ങള്‍ ഉണ്ടാക്കുന്നതായി കണ്ടെത്തിയിട്ടുണ്ട്. അടുത്തു വരുന്ന അമേരിക്കന്‍ തെരഞ്ഞെടുപ്പ്, കൊറോണാവൈറസിന്റെ വ്യാപനം തുടങ്ങി പല കാര്യങ്ങളിലും ഫേസ്ബുക്കിന്‍റെ പുതിയ സംവിധാനം ഗുണകരമാകും.
തെരഞ്ഞെടുപ്പ് പരസ്യങ്ങളോടും, വിദ്വേഷ പോസ്റ്റുകളോടും ഉള്ള നയം ഫേസ്ബുക്ക് കടുപ്പിച്ചിട്ടുണ്ട്.
