കോട്ടയം: കെ.എസ്.ആര്‍.ടി.സിയുടെ മിന്നല്‍ ബസ് വണ്‍വേ തെറ്റിച്ചെത്തി ബൈക്കിലിടിച്ച് യാത്രക്കാരനായ യുവാവ് മരിച്ചു. ചങ്ങനാശേരി മോര്‍ക്കുളങ്ങറ പുതുപ്പറമ്പില്‍ അഭിഷേക് (ശ്രീഹരി- 20) ആണ് മരിച്ചത്. അഭിഷേകിനൊപ്പം ബൈക്കില്‍ സഞ്ചരിച്ചിരുന്ന കാരാപ്പുഴ കൊല്ലമ്പറമ്പില്‍ ആരോമലിനെ (21) പരിക്കുകളോടെ ആശുപത്രിയില്‍ പ്രവേശിപ്പിച്ചു. നഗരമധ്യത്തിലുള്ള കോഴിച്ചന്ത റോഡില്‍ ഇന്ന് വെളുപ്പിന് രണ്ടരയോടെയായിരുന്നു അപകടം.
കെ.എസ്.ആര്‍.ടി.സി സ്റ്റാന്‍ഡില്‍ നിന്ന് മിന്നല്‍ ബസ് വണ്‍വേ തെറ്റിച്ച് കോഴിച്ചന്ത ഭാഗത്ത് കൂടി പോകുമ്പോഴായിരുന്നു സംഭവം. എതിര്‍ദിശയിലൂടെ എത്തിയ ബൈക്കും ബസും കോഴിച്ചന്ത റോഡില്‍ പുളിമൂട് ജംഗ്ഷന്‍ ചേരുന്ന ഭാഗത്താണ് കൂട്ടിയിടിച്ചത്. അപകടത്തില്‍ തെറിച്ച് റോഡില്‍ വീണ രണ്ടു പേരെയും നാട്ടുകാരും ഓട്ടോ ഡ്രൈവര്‍മാരും ചേര്‍ന്നാണ് ആശുപത്രിയില്‍ എത്തിച്ചത്. എന്നാല്‍ അഭിഷേകിന്റെ ജീവന്‍ രക്ഷിക്കാനായില്ല.
