കൊച്ചി: സര്‍ക്കാരിന്റെ സൗജന്യ ഓണക്കിറ്റ് വിതരണം ഇന്ന് അവസാനിക്കും. ഓഗസ്റ്റ് 23 മുതല്‍ തുടങ്ങിയ കിറ്റുവിതരണമാണ് ഉത്രാട ദിനമായ ഇന്ന് അവസാനിക്കുന്നത്. റേഷന്‍ കടകളിലേക്കെത്തിച്ച 87 ലക്ഷം കിറ്റുകളില്‍ ഇന്നലെ വൈകിട്ട് വരെയുള്ള കണക്കുകളനുസരിച്ച് 82 ലക്ഷത്തോളം കിറ്റുകള്‍ വിതരണം ചെയ്തിട്ടുണ്ടെന്നാണ് റിപ്പോര്‍ട്ടുകള്‍.

14 ഉത്പന്നങ്ങള്‍ അടങ്ങിയ കിറ്റാണ് ഇക്കുറി വിതരണം ചെയ്തത്. മില്‍മ നെയ്യും കാഷ്യു കോര്‍പ്പറേഷനിലെ കശുവണ്ടി പരിപ്പും ഇക്കുറി കിറ്റില്‍ ഇടം പിടിച്ചു. കശുവണ്ടി-50 ഗ്രാം, മില്‍മ നെയ്യ്-50 മി.ലി, ശബരി മുളക് പൊടി- 100 ഗ്രാം, ശബരി മഞ്ഞള്‍പ്പൊടി- 100 ഗ്രാം, ഏലയ്ക്ക- 20 ഗ്രാം, ശബരി വെളിച്ചെണ്ണ- 500 മി.ലി, ശബരി തേയില- 100 ഗ്രാം, ശര്‍ക്കരവരട്ടി- 100 ഗ്രാം, ഉണക്കലരി- 500 ഗ്രാം, പഞ്ചസാര- ഒരു കിലോഗ്രാം, ചെറുപയര്‍- 500 ഗ്രാം, തുവരപ്പരിപ്പ് എന്നിവ അടങ്ങുന്നതാണ് ഇത്തവണത്തെ ഓണക്കിറ്റ്.