പ്രാർത്ഥനയ്‌ക്ക് മുസ്ലീം പള്ളികളിൽ മൈക്കുകൾ ഉപയോഗിക്കുന്നതിന് നിയന്ത്രണം ഏ‍ർപ്പെടുത്തിയതിന് പിന്നാലെ ക്ഷേത്രങ്ങളിലും ക്രിസ്ത്യൻ പള്ളികളിലും പരിധിയിൽ കൂടുതൽ ഉച്ചത്തിൽ മൈക്ക് ഉപയോഗിക്കുന്നതിനെതിരെ ക‍ർണാടക പൊലീസ്. പരിസ്ഥിതി സംരക്ഷണ നിയമത്തിന് കീഴിലുള്ള ശബ്ദമലിനീകരണ നിയന്ത്രണ ചട്ടങ്ങൾ – 2000 അനുസരിച്ച് ഡെസിബെൽ അളവ് നിയന്ത്രിക്കാൻ ആവശ്യപ്പെട്ട് ക്ഷേത്രങ്ങൾക്കും പള്ളികൾക്കും പൊലീസ് നോട്ടീസ് അയച്ചു.
വ്യാവസായിക, ജനവാസ, വാണിജ്യ മേഖലകളിൽ പകലും രാത്രിയും ഉപയോഗിക്കേണ്ട ഡെസിബൽ പരിധി പൊലീസ് നോട്ടീസിൽ വ്യക്തമാക്കുന്നു. നിയമപ്രകാരമാണ് ഇക്കാര്യം ചെയ്യുന്നതെന്നും, എല്ലാ മത, മതേതര സ്ഥാപനങ്ങൾക്കും നോട്ടീസ് നൽകിയിട്ടുണ്ടെന്നും കർണാടകയിലെ ഒരു ഉന്നത പൊലീസ് ഉദ്യോഗസ്ഥൻ വ്യക്തമാക്കിതായാണ് റിപ്പോ‍ർട്ട്.