കൊച്ചി: വിമാനത്താവളങ്ങളിലെ പരിശോധനയ്‌ക്കിടെ എപ്പോഴും കൃത്രിമക്കാൽ ഊരി മാറ്റേണ്ടിവരുന്നത് കടുത്ത വേദന സഹിച്ചെന്ന് നടിയും നർത്തകിയുമായ സുധ ചന്ദ്രൻ. ഇത്തരം പരിശോധന ഒഴിവാക്കാൻ എന്തെങ്കിലും ചെയ്യണമെന്ന് സുധ പ്രധാനമന്ത്രി നരേന്ദ്രമോദിയോട് അഭ്യർത്ഥിച്ചു. ഇൻസ്റ്റഗ്രാമിൽ പങ്കുവെച്ച വീഡിയോയിലൂടെയാണ് താരം ആവശ്യവുമായി എത്തിയിരിക്കുന്നത്.
പരിശോധനകൾ ഒഴിവാക്കാൻ തന്നെ പോലുള്ള മുതിർന്ന പൗരന്മാർക്ക് പ്രത്യേക കാർഡ് നൽകുന്നത് പരിഗണനയിലെടുക്കണം. ഔദ്യോഗിക ആവശ്യങ്ങൾക്കായി യാത്ര ചെയ്യുമ്പോൾ ഓരോ തവണയും കാൽ ഊരി മാറ്റുന്നത് അസഹ്യമായ വേദന സഹിച്ചാണ്. ഇത് പരിഹരിക്കാനുള്ള നടപടി അധികൃതർ കൈക്കൊള്ളണമെന്നും സുധ ചന്ദ്രൻ അഭ്യർത്ഥിക്കുന്നു.
വർഷങ്ങൾക്ക് മുൻപ് കാറപകടത്തെ തുടർന്നാണ് സുധയ്‌ക്ക് കാൽ നഷ്ടമാകുന്നത്. പിന്നീട് കൃത്രിമ കാലിന്റെ സഹായത്തോടെ സുധ നൃത്തത്തിലേക്കും അഭിനയത്തിലേക്കും തിരിച്ചെത്തിയിരുന്നു. സുധയുടെ വീഡിയോ ഇതിനോടകം നിരവധി പേരാണ് പങ്കുവെച്ചിരിക്കുന്നത്. ഇത്തരം പരിശോധനകൾ ഒഴിവാക്കണമെന്നാണ് വീഡിയോ പങ്കുവെച്ച് എല്ലാവരും കുറിച്ചിരിക്കുന്നത്.