ലിവര്‍പൂള്‍: രണ്ട് മക്കളെ ലൈംഗികമായി പീഡിപ്പിച്ച ഭര്‍ത്താവിനെ പഞ്ചസാര ലായനി ഒഴിച്ച്‌ കൊന്ന കേസില്‍ ഭാര്യക്ക് ജീവപര്യന്തം തടവ് ശിക്ഷ വിധിച്ചു. ലിവര്‍പൂളിനടുത്തുള്ള നെസ്റ്റണിലെ മൈക്കല്‍ ബെയ്‌നി(80)നെ കൊലപ്പെടുത്തിയ കേസില്‍ കോറിന സ്മിത്തി(59)നെയാണ് ബ്രിട്ടീഷ് കോടതി ശിക്ഷിച്ചത്.
കഴിഞ്ഞവര്‍ഷമായിരുന്നു കേസിനാസ്പദമായ സംഭവം. മൈക്കല്‍ ഉറങ്ങിക്കിടക്കവെ കോറിന തിളച്ച പഞ്ചസാര ലായനി ദേഹത്ത് ഒഴിക്കുകയായിരുന്നു. ഇയാളുടെ ശരീരത്തിന്‍റെ മൂന്നിലൊന്ന് ഭാഗം ഗുരുതരമായി പൊള്ളലേറ്റു. തൊലിമാറ്റിവെക്കല്‍ ശസ്ത്രക്രിയക്ക് ഉള്‍പ്പെടെ വിധേയനായ മൈക്കല്‍ അഞ്ച് ആഴ്ച ആശുപത്രിയില്‍ കിടന്നാണ് മരണപ്പെട്ടത്.
ചെറിയ കുട്ടികളായിരിക്കെ തങ്ങളുടെ രണ്ട് മക്കളെയും മൈക്കല്‍ വര്‍ഷങ്ങളോളം ലൈംഗികമായി പീഡിപ്പിച്ചതിന്‍റെ പ്രതികാരമായാണ് കൊലപാതകമെന്ന് കോറിന മൊഴി നല്‍കിയിരുന്നു. കുട്ടിക്കാലത്ത് വര്‍ഷങ്ങളോളം അച്ഛന്‍ തന്നെയും സഹോദരനെയും പീഡിപ്പിച്ചതായി മകളും വെളിപ്പെടുത്തി. തുടര്‍ന്ന്, സഹോദരന്‍ ക്രെയ്ഗ് 2007ല്‍ ആത്മഹത്യ ചെയ്തിരുന്നു.
