ആംസ്റ്റർഡാം: യൂറോ കപ്പ് പ്രീ ക്വാർട്ടറിലെ ആദ്യ മത്സരത്തിൽ കരുത്തരായ വെയ്ൽസിനെ കീഴടക്കി ഡെൻമാർക്ക് ക്വാർട്ടർ ഉറപ്പിച്ചു. എതിരില്ലാത്ത നാല് ഗോളുകൾക്കായിരുന്നു ഡെൻമാർക്കിന്‍റെ വിജയം. യുവതാരം കാസ്പെർ ഡോൾബെർഗിന്റെ ഇരട്ട ഗോളിലാണ് ഡെൻമാർക്കിന്‍റെ മിന്നും ജയം.
മത്സരത്തിലുടനീളം ആധിപത്യം പുലർത്തിയാണ് ഡെൻമാർക്ക് കഴിഞ്ഞ യൂറോകപ്പിലെ സെമി ഫൈനലിസ്റ്റുകളായ വെയ്ൽസിനെ മടക്കിയയച്ചത്. കാസ്പെറിനു പുറമേ യോക്കിം മേൽ, മാർട്ടിൻ ബ്രാത്ത്‌വെയ്റ്റ് എന്നിവരും ഡെൻമാർക്കിനായി സ്കോർ ചെയ്തു.
തുടക്കം മുതൽ ഡെൻമാർക്കിന് യാതൊരു വെല്ലുവിളിയും ഉയർത്തനാകാതെയാണ് ഗരെത് ബെയ്‌ലും സംഘവും മടങ്ങുന്നത്. 27-ാം മിനിറ്റിൽ കാസ്പെറിയാണ് ഡെൻമാർക്കിനായി ആദ്യ ഗോൾ നേടുന്നത്. രണ്ടാം പകുതിയുടെ തുടക്കത്തിലും കാസ്പെറി (48-ാം മിനിൽ) വെയ്ൽസിന്‍റെ വലകുലുക്കി.
പിന്നീട് രണ്ട് ഗോളുകളും പിറന്ന് അവസാന മിനിറ്റുകളിലായിരുന്നു. 88-ാം മിനിറ്റിൽ യോക്കിം മേലും 94-ാം മിനിറ്റിൽ മാർട്ടിൻ ബ്രാത്ത്‌വെയ്റ്റും വെയ്ൽസിന്‍റെ വലയിലേക്ക് നിറയൊഴിച്ചു.
