ബംഗളുരു: കൊറോണ മാനദണ്ഡങ്ങൾ ലംഘിച്ച്‌ കർണാടകയിൽ ബിജെപി മന്ത്രിയുടെ ജന്മദിനാഘോഷം. മുതിർന്ന മന്ത്രിയായ കെഎസ് ഈശ്വരപ്പയാണ് സംസ്ഥാനത്ത് ലോക്ഡൗൺ ഉൾപ്പടെയുള്ള കൊറോണ നിയന്ത്രണങ്ങൾ നിലനിൽക്കെ ബന്ധുക്കൾക്കും സുഹൃത്തുക്കൾക്കുമൊപ്പം ജന്മദിനമാഘോഷിച്ചത്.
കഴിഞ്ഞ ദിവസം കൊറോണ കെയർ സെൻററായി നിശ്ചയിച്ച ശിവമോഗയിലെ ശുഭമംഗല സമുദായ ഭവനത്തിന്റെ കോമ്പൗണ്ടിലുള്ള ഗണപതി ക്ഷേത്രത്തിലാണ് വിലക്കുകൾ ലംഘിച്ച്‌ 73-ാം ജന്മദിനമാഘോഷിക്കാൻ മന്ത്രിയും പേരക്കുട്ടികളുമടങ്ങുന്ന കുടുംബമെത്തിയത്.
14 പേരാണ് ക്ഷേത്രത്തിലെത്തിയത്. കൊറോണ കെയർ സെൻററായ പ്രധാനകെട്ടിടത്തിൽ നിരവധി കൊറോണ രോഗികൾ ചികിത്സയിൽ കഴിയുന്നതിനിടിയിൽ രാവിലെ 8.15 ഓടെയാണ് ഈശ്വരപ്പയും കുടുംബവും ക്ഷേത്രത്തിലെത്തിയത്. 30 മിനിറ്റോളം അദ്ദേഹം ക്ഷേത്രത്തിൽ തങ്ങിയതായും ദൃക്സാക്ഷികൾ പറഞ്ഞതായി മാധ്യമങ്ങൾ റിപ്പോർട്ട് ചെയ്തു.
അതെ സമയം സംഭവത്തെ കുറിച്ച്‌ തങ്ങൾക്ക് ഒന്നും അറിയില്ലെന്ന് ജില്ലാ ഭരണകൂടം വ്യക്തമാക്കി. 14 വരെ സംസ്ഥാനത്ത് ലോക്ഡൗൺ നീട്ടിയിരിക്കെയാണ് മന്ത്രിയുടെ നടപടി.