തിരുവനന്തപുരം: സ്വർണക്കടത്ത്‌ കേസിൽ മുഖ്യമന്ത്രിയെ പ്രതിയാക്കാൻ സ്വപ്ന സുരേഷിനെ പ്രേരിപ്പിച്ചെന്ന ആരോപണത്തിൽ എൻഫോഴ്‌സ്‌മെന്റ് ഡയറക്ടറേറ്റിനെതിരെ (ഇഡി) ക്രൈംബ്രാഞ്ച് കേസെടുത്തു. മുഖ്യമന്ത്രി പിണറായി വിജയനെതിരെ വ്യാജമൊഴി നൽകാൻ പ്രേരിപ്പിച്ചെന്നാണ് കേസ്.
സ്വപ്നയുടെ ശബ്ദരേഖ അന്വേഷിച്ച സംഘത്തിൻറെ റിപ്പോർട്ടിന്റെ അടിസ്ഥാനത്തിലാണ് നടപടി. കേസെടുക്കാമെന്ന് ഡയറക്ടർ ജനറൽ ഓഫ്‌ പ്രോസിക്യൂഷൻ (ഡിജിപി) കഴിഞ്ഞദിവസം ആഭ്യന്തര സെക്രട്ടറിക്ക്‌ നിയമോപദേശം നൽകിയിരുന്നു.ഐപിസി 116, 120 ബി, 167, 192, 193, 195 എന്നീ വകുപ്പുകൾ പ്രകാരം എഫ്‌ഐആർ രജിസ്‌റ്റർ ചെയ്യാനാണ്‌ നിയമോപദേശം.
ജീവപര്യന്തംവരെ ശിക്ഷ കിട്ടാവുന്ന കള്ളത്തെളിവ്‌ സൃഷ്ടിക്കൽ, പൊതുസേവകൻ കള്ളരേഖ ചമയ്ക്കൽ, ഗൂഢാലോചന, പ്രേരണ തുടങ്ങിയ കുറ്റങ്ങൾക്കുള്ള വകുപ്പുകളാണിത്‌. ഡോളർ കടത്തിയത് മുഖ്യമന്ത്രി കൂടി പ്രേരിപ്പിച്ചിട്ടെന്നായിരുന്നു സ്വപ്നയുടെ മൊഴി.
ഇഡി സമ്മർദം ചെലുത്തിയിട്ടാണ് മൊഴിയെന്ന് സുരക്ഷാച്ചുമതലയുള്ള പോലീസുകാരി പറഞ്ഞിരുന്നു.20-11-2020ന് ഇഡി നൽകിയ കത്തിന്റെ അടിസ്ഥാനത്തിലായിരുന്നു ക്രൈംബ്രാഞ്ച് അന്വേഷണം. ഈ അന്വേഷണത്തിലാണ് ഇഡിക്കെതിരെ സാക്ഷിമൊഴികൾ ലഭിച്ചത്.
