തിരുവനന്തപുരം: വാർഷിക പരീക്ഷയില്ലാതെ ഒമ്പതാം ക്ലാസ് വരെയുള്ള വിദ്യാർഥികൾക്ക് ഓൾപാസ് നൽകാൻ വിദ്യാഭ്യാസ വകുപ്പ് തീരുമാനിച്ചു. കൊറോണ വീണ്ടും വ്യാപിക്കുന്ന സാഹചര്യത്തിലാണ് നടപടി. എട്ടാം ക്ലാസ് വരെ ഓൾ പാസ് നൽകാൻ നേരത്തെ തീരുമാനിച്ചിരുന്നു. ഒമ്പതാം ക്ലാസിന് പരീക്ഷ നടത്താമെന്നായിരുന്നു ആദ്യം തീരുമാനിച്ചത്. എന്നാൽ, കൊറോണ വ്യാപന പശ്ചാത്തലത്തിലാണ് ഇത് ഉപേക്ഷിക്കാൻ വിദ്യാഭ്യാസ സെക്രട്ടറിയുടെ അധ്യക്ഷതയിൽ ചേർന്ന ഉന്നതതലയോഗം തീരുമാനിച്ചത്.
നിബന്ധനകൾക്ക് വിധേയമായാണ് ഒമ്പതാം ക്ലാസുകാരെ വിജയിപ്പിക്കുക. ഇതിന് ഓൺലൈൻ ക്ലാസുകളിലെ ഹാജർ ഉൾപ്പെടെ പരിഗണിക്കും. കഴിഞ്ഞവർഷം പാദവാർഷിക, അർധ വർഷ പരീക്ഷകളുടെ മാർക്ക് കണക്കിലെടുത്തായിരുന്നു വിജയിപ്പിച്ചത്. എന്നാൽ, ഇത്തവണ ഈ പരീക്ഷകളും നടത്തിയിട്ടില്ല.
10, പ്ലസ് ടു ക്ലാസുകളിലൊഴികെ മറ്റൊരു ക്ലാസിലും വാർഷിക പരീക്ഷ വേണ്ട എന്നാണ് തീരുമാനം. പ്ലസ് വൺ പരീക്ഷയെ കുറിച്ച്‌ പിന്നീട് തീരുമാനിക്കും. ഈമാസം അവസാനം വരെ 10, പ്ലസ് ടു റിവിഷൻ ക്ലാസുകൾ തുടരും.