ബംബോലിം : ഇന്ത്യൻ സൂപ്പർ ലീഗ് ഫുട്ബാളിന്റെ ഏഴാം സീസണിന് ഇന്ന് തുടക്കം. കൊറോണ മഹാമാരിയുടെ വരവിന് ശേഷം രാജ്യം ആതിഥ്യം വഹിക്കുന്ന ആദ്യ കായിക മാമാങ്കമാണിത്. കൊറോണയുടെ പശ്ചാത്തലത്തിൽ പതിവ് ഹോം ആൻഡ് എവേ മത്സരങ്ങൾ ഒഴിവാക്കി ഗോവയിലെ മൂന്ന് വേദികളിലായാണ് ഇക്കുറി എല്ലാമത്സരങ്ങളും സംഘടിപ്പിക്കുന്നത്.
ഇന്ന് രാത്രി 7.30ന് ബംബോലിം സ്റ്റേഡിയത്തിൽ കേരള ബ്ളാസ്റ്റേഴ്സും എടികെ മോഹൻ ബഗാനും തമ്മിലാണ് ഉദ്ഘാടന മത്സരം. ഒട്ടേറെ മാറ്റങ്ങളുമായാണ് ഇക്കുറി എസ്എല്ലിന് കൊടിയേറുന്നത്. പുതിയ ഒരു ടീം എത്തുന്നതിനൊപ്പം നിലവിലെ ചാമ്പ്യന്മാരായ എടികെ ഐ- ലീഗ് ക്ളബ് ആയിരുന്ന മോഹൻ ബഗാനുമായി ചേർന്ന് എടികെ-മോഹൻ ബഗാനായി മത്സരിക്കാൻ ഇറങ്ങുന്നു.
ഈസ്റ്റ് ബംഗാളാണ് ഐഎസ്എൽ അരങ്ങേറ്റം കുറിക്കുന്നത്.ഇതോടെ ലീഗിലെ ടീമുകളുടെ എണ്ണം 11 ആയി .
