ബ്യൂണസ് അയേഴ്‌സ്: ടിവി ചാനലിന് വേണ്ടി വാര്‍ത്ത ലൈവായി പറയവേ റിപ്പോര്‍ട്ടറുടെ മൊബൈലും തട്ടിപ്പറിച്ച്‌ കള്ളന്‍ കടന്നു കളഞ്ഞു. അര്‍ജന്റീനയിലാണ് സംഭവം. മോഷണം ലൈവ് റിപ്പോര്‍ട്ടിങിനിടെയായിരുന്നതിനാല്‍ ഇതിന്റെ ദൃശ്യങ്ങള്‍ ചാനല്‍ തന്നെ പുറത്തുവിട്ടു. സംഭവം സാമൂഹിക മാധ്യമങ്ങളില്‍ വ്യാപകമായാണ് പ്രചരിക്കുന്നത്.
അര്‍ജന്റീനയിലെ പ്രമുഖ ടെലിവിഷന്‍ ചാനലായ എന്‍ വിവോ എല്‍ നുവെ ചാനല്‍ റിപ്പോര്‍ട്ടര്‍ ഡിമാര്‍സോയ്ക്കാണ് ലൈവ് പറയുന്നതിനിടെ ഫോണ്‍ നഷ്ടമായത്. വാര്‍ത്ത റിപ്പോര്‍ട്ട് ചെയ്യുന്നതിനിടെ പെട്ടെന്ന് എത്തിയ കള്ളന്‍ ഡിമാര്‍സോയുടെ കൈയില്‍ നിന്ന് ഫോണ്‍ തട്ടിപ്പറിച്ച്‌ ഓടുകയായിരുന്നു.പിന്നാലെ ഡിമാര്‍സോ ഫോണ്‍ തിരികെ തരൂ എന്ന് ആവശ്യപ്പെട്ട് ഓടിയെങ്കിലും നല്ല വേഗതയില്‍ ഓടിയ കള്ളന്‍ പ്രധാന പാതയില്‍ നിന്ന് തെറ്റി മറ്റൊരു ഇടുങ്ങിയ വഴിയില്‍ മറയുന്നത് വീഡിയോയില്‍ കാണാം.
അതിന് പിന്നാലെ നാട്ടുകാരായ കുട്ടികളടക്കമുള്ളവര്‍ കള്ളനെ അന്വേഷിച്ച്‌ പിന്നാലെ ഓടുന്നതും വീഡിയോയിലുണ്ട്. എതായാലും കള്ളനാരാണെന്ന് നാട്ടുകാര്‍ക്ക് മനസിലാകുകയും കൈയോടെ ഇയാളെ പൊക്കുകയും ചെയ്തു.
ഫോണ്‍ തിരികെ ഡിമാര്‍സോയ്ക്ക് തന്നെ നല്‍കാനും നാട്ടുകാരുടെ ശ്രമത്തിലൂടെ സാധിച്ചു. നാട്ടുകാര്‍ക്ക് ഡിമാര്‍സോ നന്ദി പറഞ്ഞു. അവരുടെ സമര്‍പ്പണത്തേയും സഹാനുഭൂതിയേയും ഡിമാര്‍സോ അഭിനന്ദിച്ചു.
രസകരമായ സംഭവം ഇതാ കാണാം