മുംബൈ: മയക്കുമരുന്ന്​ മാഫിയയുമായി ബന്ധപ്പെട്ട അന്വേഷണം ബോളിവുഡിലെ 25 ഓളം താരങ്ങളിലേക്കെന്ന് റിപ്പോർട്ട്​. സുശാന്ത്​ സിങ്​ രാജ്​പുതിന്റെ മരണവുമായി ബന്ധപ്പെട്ട മയക്കുമരുന്ന്​ കേസിൽ അറസ്​റ്റിലായ കാമുകിയും നടിയുമായ റിയ ചക്രബർത്തി നാർക്കോട്ടിക്​ കൺട്രോൾ ബ്യൂറോ​​യോട്​ താരങ്ങളുടെ പേരുകൾ വെളിപ്പെടുത്തി.

25 പേർക്കും എൻസിബി ഉടൻ നോട്ടീസ്​ അയക്കുമെന്നാണ്​ വിവരം. ​താരങ്ങളുടെ പട്ടിക മുതിർന്ന ഉദ്യോഗസ്​ഥർക്ക്​ കൈമാറുകയും ചെയ്യുമെന്നാണ് റി​പ്പോർട്ട്​. റിയയെ ചൊവ്വാഴ്​ച മൂന്നാംതവണയും ചോദ്യം ചെയ്​തതിനുശേഷമാണ്​ അറസ്​റ്റ്​ ചെയ്​തത്​. താൻ കഞ്ചാവ്​ ഉപയോഗിക്കാറില്ലെന്നും രാസവസ്​തുക്കളാണ്​ ഉപയോഗിക്കുന്നതെന്നും മൊഴി നൽകിയതായാണ്​ വിവരം.

റിയയുടെ സഹോദരൻ സൗവിക്ക്​ ചക്രബർത്തിയും മയക്കുമരുന്ന്​ മാഫിയയുമായി ബന്ധമുള്ള ചില താരങ്ങളുടെ പേരുകൾ വെളിപ്പെടുത്തിയിരുന്നു. ബോളിവുഡ്​ താരങ്ങളുടെ മയക്കുമരുന്ന്​ മാഫിയയുമായുള്ള ബന്ധം തുറന്നുകാണിക്കുന്ന ഒട്ടേറെ ഡിജിറ്റൽ തെളിവുകൾ എൻസിബി കണ്ടെടുത്തിരുന്നു.

മയക്കുമരുന്ന്​ ഉപയോഗിച്ചിരുന്ന ബോളിവുഡ്​ പാർട്ടികളെക്കുറിച്ചും റിയ എൻ.സി.ബിയോട്​ പറഞ്ഞു. സുശാന്തിന്റെ ഒരു സിനിമയുടെ സെറ്റിൽ വെച്ചാണ്​ മയക്കുമരുന്ന്​ ഉപയോഗിച്ച്​ തുടങ്ങിയതെന്നും റിയ പറഞ്ഞു. സുശാന്തിന്റെ സിനിമയിൽ ഒപ്പം അഭിനയിച്ചവർക്കും നോട്ടീസ്​ അയച്ചതായാണ്​ വിവരം.