വാകത്താനം: കോട്ടയം വാകത്താനത്ത് മഴുവിനു വെട്ടേറ്റു ഗൃഹനാഥന്‍ കൊല്ലപ്പെട്ടു. വാകത്താനം പൊങ്ങന്താനം മുടിത്താനംകുന്ന് കരപ്പാറ വീട്ടില്‍ ഔസേപ്പ് ചാക്കോ (കുഞ്ഞുഞ്ഞ് -78)യാണ് കൊല്ലപ്പെട്ടത്. ഇന്നു രാവിലെ 8.30നാണ് സംഭവം. സംഭവവുമായി ബന്ധപ്പെട്ടു അയല്‍വാസിയായ കരിക്കണ്ടം മാത്തുക്കുട്ടിയെ പോലീസ് കസ്റ്റഡിയിലെടുത്തു.
നാളുകളായി കുഞ്ഞുഞ്ഞും ഭാര്യ ഏലിയാമ്മയും തനിച്ചാണ് താമസിക്കുന്നത്. നാളുകളായി കുഞ്ഞുഞ്ഞും മാത്തുക്കുട്ടിയും തമ്മില്‍ സ്ഥലത്തിന്‍റെ അതിരു തര്‍ക്കം നിലനിന്നിരുന്നതായി പോലീസ് പറഞ്ഞു. മാത്തുക്കുട്ടിയും ഭാര്യ പെണ്ണമ്മയും തനിച്ചായിരുന്നു താമസിച്ചിരുന്നത്. കോവിഡ് കാലഘട്ടമായതിനാല്‍ സ്ഥലത്തേക്കു കൂടുതല്‍ ആളുകളെ പോലീസ് പ്രവേശിപ്പിക്കുന്നില്ല. വാകത്താനം എസ്‌എച്ച്‌ഒ കെ.പി. ടോംസണിന്‍റെ നേതൃത്വത്തിലുള്ള പോലീസ് സംഘം സ്ഥലത്തെത്തി തുടര്‍നടപടികള്‍ സ്വീകരിച്ചു.
മൃതദേഹം പോസ്റ്റ്മോര്‍ട്ടത്തിനായി കോട്ടയം മെഡിക്കല്‍ കോളജിലേക്കു മാറ്റി. പോലീസ് മാത്തുക്കുട്ടിയെ കൂടുതല്‍ ചോദ്യം ചെയ്തു വരികയാണ്. കുഞ്ഞുഞ്ഞിന്‍റെ മക്കള്‍: ഷാജി (ഡല്‍ഹി), ഷാബു (യു.കെ.), ഷൈല (ഡല്‍ഹി).
